Kumele i-ANC ibhule umlilo usesemafusini
MHLELI: Kumele i-ANC ibuyekeze imigomo yayo ebandakanya izimfundiso zeqembu, ukuze amalungu ayo ezokhumbula izifungo azibophezela kuzo. Isimo simanzonzo ngenxa yezinhlangothi ezingaphakathi eqenjini futhi siyidungamuzi ekhaya likaKhongolose.
I-ANC ayibhule umlilo usesemafusini ngoba uma uke wangena ngaphakathi eLuthuli House uzovutha ubuhanguhangu futhi ngeke ulawuleke. Isinqumo seqembu sokushenxisa amalungu asolwa ngenkohlakalo, sesiphenduke umswane wembabala.
Ngike ngaxwayisa ngokungase kwenzeke eqenjini izinkukhu zingakehli emthini, sekuyacaca ukuthi sekuya ngamagama enkehli. Izingqinamba zeqembu zicace bha.
UKhongolose uma ungaphika ukuthi iwa libheke umoya, kuyobe uvika ngehawu lengulube. Okubuhlungu wukuthi zonke izimfihlo namahlazo abaholi abaphezulu kuzulelwa amanqe ngoba sekunomkhuba ofufusayo wokudalula izindaba zabanye ngaphakathi.
Okufaka uvalo wukuthi zonke izinxushunxushu zivundululeka nje, akusensuku zatshwala sibe nokhetho lohulumeni basekhaya kanti phela ingwe idla ngamabala okhethweni. Lo mgomo wokushenxisa abasolwa ngenkohlakalo ezikhundleni, uzohlakaza iqembu libe nhlakanhlaka ngoba kungathi awuhambisani noMthethosisekelo wezwe.
I-ANC ayiziqoqe, isombulule izinkinga zayo ngaphakathi ingajahi nokugijimela enkantolo. Iqembu alibuyekeze imigomo nezimfundiso zalo ukuze noma ngubani aqonde ukuthi kufanele aziphathe kanjani, nokuthi yini elindeleke kuye njengelungu.
Ngiyifisela inhlanhla i-ANC, sengathi ingalusingatha ngobunono bekati udaba lwayo igade namaxoki kwazise angena ngenxeba njengempethu.
Phondolwendlovu Mzolo
EMKHAMBATHINI