Kuvulwe isikhungo sezicishamlilo eVerulam
SEBEZOBIZWA basabele eduze abezicishamlilo ngemva kokuvulwa kwesikhungo sezicishamlilo ngokusemthethweni eVerulam, eThekwini, ngoMgqibelo.
Udle uMasipala weTheku uR27 million umsebenzi wokwakhiwa kwalesi sikhungo.
Lo mkhandlu uthi kuzosizakala kakhulu abantu abakhele iVerulam okubalwa kubo abaseCanelands, isikhumulo sezindiza iKing
Shaka, iCornubia,
Phonenix nasoThongathi.
IMeya yeTheku, uMnuz Mxolisi
Kaunda, okuyiyona evule le ndawo, ithe imiphakathi izosizakala ngokuphazima kweso uma kuvela izehlakalo ezidinga kucinywe umlilo kutakulwe.
UKaunda uthe abasebenzi balesi sikhungo esisezingeni eliphezulu, bazohlenga impilo yabantu ngoba bazinikele kulo msebenzi
Uqhube wathi abasebenzi balesi sikhungo banolwazi olunzulu ngalo msebenzi futhi ukuqeqeshwa kwabo kusezingeni eliphezulu.
“Kuzohlomula abantu namabhizinisi akhele lezi zindawo ngosizo olubalulekile oluzohlinzekwa yilesi sikhungo.
Asiqedile ukusakha ngoba kusazodlulelwa kwezinye izigaba, kumele kube khona konke okudingekayo.
Selokhu siqalile ukusebenza lesi sikhungo sikwazile ukungenelela ezehlakalweni ezingu-54,” kusho uKaunda.
Uthe ngesikhathi sikahulumeni wobandlululo indawo efana nalena ubungeke uyithole eVerulam, ePhoenix, eNanda, KwaMashu naseNtuzuma ngoba bekuyizikhungo ezibekelwe abantu abambalwa kuphela.
Uthe bayazigqaja bewumasipala ngoba bayishintshile impilo yabantu.
“Kunezimoto eziwuhlobo oluhle, ezinobuchwepheshe besimanje obubalulekile ukuze zikwazi ukufinyelela ngesikhathi noma yikuphi lapho zibizelwa khona izehlakalo zokucinywa komlilo,” kusho uKaunda.
Unxenxe umphakathi ukuba uqinisekise ukuthi usigcina sisemeni esihle lesi sikhungo athe umkhandlu ususidlulisele ezandleni zawo.