U-Hunt akafuni bayidelele iSimba
UMQEQESHI weKaizer Chiefs, uGavin Hunt, ubona ukuxebula kwabo iSimba SC yaseTanzania koweCAF Champions League kuzozithoba izinhliziyo zabalandeli baleli qembu abamashele eNaturena ngesonto eledlule.
Amakhosi adlule ngehubo lika-4-0 kowomlenze wokuqala wama-quarterfinal ngoMgqibelo ebusuku. Lokhu kubeke iChiefs ethubeni elihle lokwedlulela kowandulela owamanqamu. Umdlalo womlenze wesibili uzodlalelwa eDar es Salaam ngoMgqibelo ngo-3 ntambama.
I-Chiefs icoboshisa iSimba nje bekusaphele amahora ambalwa abalandeli bayo begcwale izitaladi, babheka emahhovisi eNaturena ukuyokwethula incwadi yezikhalo kubaphathi bekhala ngokubhacaza kweqembu.
"Mhlawumbe lokho kusisizile ukuthi siwine, mhlawumbe sidinga amanye amamashi," kuntela uHunt ngemuva komdlalo.
"Kufanele sibahloniphe abalandeli, bezwa ubuhlungu. Sonke siyabuzwa. Bazwakalise izikhalo zabo. Ngicabanga ukuthi ibalulekile indlela eyenziwe, yasingathwa ngayo. Kubalulekile ukuthi sibhukule. Ngicabanga ukuthi ukuwina namuhla kuzodambisa kancane. Kodwa okwenzeke namuhla ebusuku akuncikile emdlalweni olandelayo. Ibhola limayelana nalokho. Kubalulekile ukuthi sisebenze kanzima, sinike abalandeli abakufunayo."
Ekuhambeni, iChiefs idinga ukugwema ukungenelwa ngamagoli angaphezulu kwamane, uma yona ingashayanga lutho, ukuze izodlulela kowandulela owamanqamu. Emuva kwesikhathi esingaphezu konyaka, abadlali beChiefs bazodlala phambi kwabalandeli kwazise sebebuyele enkundleni eTanzania. EMzansi selokhu bavalwa ngesizini edlule ngenxa yokudlanga kweCovid-19.
"Kuseyisiwombe sokuqala, sisazoya kubona. Ngiyazi ukuthi kunjani laphaya, inkundla izobe igcwele. Kufanele sihlakaniphe, singahlali emuva kodwa sishaye amagoli. Ngiyaziqhenya ngeqembu. Sizozama ukushaya igoli laphaya. Kodwa kulula ukusho kunokwenza," kusho uHunt.
"Bazolenyusa kakhulu izinga. Bayiqembu elikhulu, banesithunzi okufanele basidlalele. Nginesiqiniseko ukuthi bazobe benomqondo wokuwina nakho konke okuhambisana nawo. Sengake ngaya laphaya. Sadlala ne-Azam lapha (eMzansi).
Yaba yiqembu elihlukile isingakubo. Kwaba sengathi inabadlali abangu-12 noma
13. Ngakho kuzoba wumdlalo ohluke kakhulu. Asidlule kulokhu esesikwenzile, sibuyele enkundleni yokuziqeqesha, siqhubeke nokulungisa okufanele sikuqondise. Yilokho engingakwenza,“kusho uHunt.