I-Downs iphuce iBucs iqatha emlonyeni
IMAMELODI SUNDOWNS ingene ngembobo yenaliti emidlalweni eyandulela owamanqamu kwiDStv Diski Challenge Rewired ngesikhathi iguqisa ngo 1-0 i-Orlando Pirates emdlalweni obuseLucas Moripe Stadium, ePitoli izolo ntambama.
Igoli elinqobise abafana abancane bamaBrazilians abaqeqeshwa nguSurprise Moriri, libekwe enethini nguMsawenkosi Mdluli ngomzuzu ka-96 esikhathini somusa kanompempe.
Kufanele ukuthi namanje lapho ekhona u-Elson Sithole ongunozinti weBucs uyazisola ngesenzo sakhe sokuchitha isikhathi singekho isidingo nokuholele ekutheni unompempe engeze isikhathi ebesesivele siphelile nokwenze ukuthi iDowns igcine ithole igoli elimqoka eliyiweze ngelibanzi.
Ukunqoba kweSundowns lapha kuyenze yahlala endaweni yesibili kuGroup B ngamaphuzu angu13 emidlalweni eyisikhombisa. IChiefs iqhwakele phezulu kuleli qoqo ngamaphuzu angu-18.
Emdlalweni owandulela owamanqamu, iSundowns izobhekana neCape Town City yona eqede phezulu kuGroup A ngamaphuzu angu-14. IChiefs izobhekana naMaZulu FC alale isibili kuGroup A ngamaphuzu angu-13.
Imidlalo eyandulela owamanqamu izokuba ngoMgqibelo enkundleni esazomenyezelwa yiPremier Soccer League (PSL).
Ukungena emdlalweni weDowns neBucs. Uqale ngegiya eliphezulu kodwa eZimnyama kuyizona ebezingaphezulu ngomdlalo njengoba bezifika kuvalwe amehlo emapalini amaBrazilians abegadwe ngukaputeni uGlen Baadjies.
Ngomzuzu wesishiyagalolunye, uSifiso Luthuli wePirates uhlulwe yithuba lokungqofela phakathi ngekhanda ibhola elihle abeligotshelwe nguThabiso Monyane, ibhola laphuma eceleni kwepali.
Ngomzuzu ka-22 uLuthuli uphinde wadlala ngomsebenzi, ecucuza ebhokisini esikhundleni sokukhahlela ibhola laze lagcina likhishwe yizitobha zabafana bakaMoriri.
Kungazelele muntu ngomzuzu ka-41 uMdluli wamaSandawana uthumele inguzunga yeshodi kodwa wakwazi ukuyichithela phezulu kwepali uSithole weBucs.
Esiwombeni sesibili amaBrazilians abuye ngomfutho. Ngomzuzu ka-51 athole ithuba lokushaya igoli kodwa ibhola likaSthabiso Ndaba laphumela eceleni kwepali.
Ngesikhathi wonke umuntu esezitshela ukuthi abafana bePirates abacijwa nguMandla Qhogi bazodlulela emzuliswaneni olandelayo njengoba bese kubukwa amawashi, kuqhamuke uMdluli othole ibhola kuNyanga walibeka enethini kwaba wukuphela kanjalo kweBucs kwiDiski Challenge kule sizini ka-2020/2021.
Imiphumela yeDStv Diski Challenge yangempelasonto:
Mariztburg United 0-0 TS Galaxy, Stellenbosch FC 3-2 Chippa United, Bloemfontein Celtic 2-1 Baroka FC, Swallows FC 2-4 Black Leopards, AmaZulu FC 1-1 Cape Town City, Lamontville Golden Arrows 3-2 SuperSport United, Tshakuma1-3 Kaizer Chiefs, Mamelodi Sundowns 1-0 Orlando Pirates.