Ushonelwe yindodakazi umethuli wezinhlelo
IPHINDE yehlelwa yifu elimnyama ngoLwesibili indodakazi yabaculi bakamaskandi uHhashi Elimhlophe noLinah Ngcobo, uNtombi Mzolo, ngemva kokushona kwendodakazi yayo encane.
UNtombi owethula izinhlelo ezihlukene kuMoja Love, okubalwa noluthi Lekunutu, kuthiwa indodakazi yakhe uLinile Vunani Mzolo, ishone engozini yemoto ihamba naye.
Kwenzeka lesi sigameko nje, uNtombi uke washonelwa ngenye yezingane zakhe ngo-2015 emuva kokuba izalwe inesifo esingajwayelekile esiphathelene nenhliziyo.
ULinah, owaziwa ngelikaEbony nongunina kaNtombi, uthe kubuhlungu okwenzekile kodwa konke bakubeka kuMdali.
“UNtombi akalimalanga ngesikhathi kwenzeka lesi sigameko kodwa ingane yona iphelele lapho kwenzeka khona isigameko.
“Senzeke ngesikhathi beyolanda omunye omdala esikoleni. Kubuhlungu kakhulu. Sibonga imithandazo yabantu abalokhu besithumelela yona isho lukhulu kuthina.
“Okunye siyophinde sikukhulume. Akukhulumeki kulesi simo esikusona,” kusho u-Ebony.
UNtombi uveze izindaba zokushona kwendodakazi yakhe ekhasini lakhe kwi-instagram, wathi “Amazulu asephinde athola enye ingilosi”.
Akabange esanda namaningi uthe lonke ithemba balibeka kuNkulunkulu, nokunguyena ozobadlulisa kulesi simo.
Osaziwayo abahlukene okubalwa uNomsa Shezi,
Naked DJ, Arthur Mafokate, Sthandwa Nzuza badlulise amazwi enduduzo kuNtombi nasemndenini wakhe.
Kanti akuyena uNtombi kuphela oke wehlelwa yilo mshophi, ngo-2009 umculi uNhlanhla Nciza washonelwa yindodakazi yakhe eyayineminyaka engu-15 uZinathi, engozini yemoto.
Umamezala kaNhlanhla, wayesendleleni eyolanda umzala kaZinathi enkulisa ngesikhathi imoto ishayisa isihlahla, waphuthunyiswa esibhedlela uZinathi kepha wafike washonela khona.