Baphefumula ngokuhlehla kohlelo lukaKhuzani
LUZOQALA ngeSonto elizayo uhlelo oluzokhuluma ngempilo kaKhuzani Mpungose (osesithombeni), oluthi Khuzani Bo! Lolu hlelo luzobheka impilo ephilwa yilo mculi waseNkandla, ingoma yakhe ethi Ijele, ehlukanise unyaka.
UCaroline Phalakatshela weSABC uveze ukuthi azikho izingqinamba ezibenze bahlehlisa usuku okuzoqala ngalo uhlelo.
“Sifuna ukuqondanisa uhlelo nosuku lwamagugu nokuyinto esiyibone izohambisana kahle kakhulu. Siyaxolisa kubabukeli akade sebelulinde ngabomvu uhlelo kodwa bangakhathazeki, luyeza maduzane futhi bazolujabulela,” kusho uCaroline.
Uhlelo luqoshwe yinkakha emkhakheni wokuqopha izinhlelo ezikhombisa impilo yosaziwayo uLegend Manqele, onenkampani iThe BarLeader Production.
Uphrojusa walo, nguAyanda Melansi, onguphrojusa emsakazweni Ukhozi FM.
Ekhuluma neSolezwe, u-Ayanda uthe ujabule futhi unovalo ngokukhiqizela ithelevishini izinhlelo kodwa ukusondelana noLegend, kumsizile.
“Besisizana ngesikhathi siqopha njengoba besifundisana izinto ezihlukene. Ubesho kimi athi angimfundise izinto ezihlukene ngomaskandi nangempela ngimtshele lokho afuna ukukufunda, nami ngokunjalo bengisho ukuthi angifundise engifuna ukukwazi kulo mkhakha wokuqopha izinhlelo, nangempela angisize,”kusho u-Ayanda.
Uthe eqopha lolu hlelo, ubematasa nangezincwadi efunda.
“Bengizinikele njengoba bengizitshela ukuthi lokhu ngizokwenza kokubili, ngiyathemba abantu bazolujabulela uhlelo,” kuphetha u-Ayanda.
Uhlelo luqala nje, ngo-Okthoba 23, uKhuzani uzoqopha i-video yengoma yakhe ethi Ijele, eWorkshop, eThekwini.
Kuthi ngo-Okthoba 24, ayiqophe eGoli, epaki iJeppe.
UKhuzani unxuse abalandeli bakhe ukuthi baphume ngobuningi kuyona yomibili le micimbi njengoba kuzobe kusaqhubeka kuqoshwa uhlelo.