Kushone ababili bedubulana namaphoyisa
KUSALE enkundleni abesilisa ababili okubikwa ukuthi bebedubulana namaphoyisa emgwaqweni, uNorthern Drive, ePhoenix, ngoLwesithathu ngo-9.20 ebusuku.
Kuthiwa amaphoyisa abephansi phezulu kuleya ndawo eqaphe ubugebengu kanti azozithela emotweni ebinabesilisa abathathu abebesolisa.
Amaphoyisa kuthiwa ayijahile le moto ezama ukuthi ayimise esebenzisa amalambu aluhlaza ne-siren.
Kubikwa ukuthi umshayeli wayo akazange ame, kunalokho uyishaye yazula ibanga elide.
Okhulumela amaphoyisa KwaZuluNatal, uColonel Thembeka Mbele, uthe imoto ebihamba abasolwa igcine imile.
“Iphoyisa elilodwa lehle emotweni yawo lathi liya kula madoda avele avulela ngentululwane yezinhlamvu ebhekise emaphoyiseni.
“Iphoyisa elilodwa lidubuleke emlenzeni kodwa alishonanga,” kusho uCol Mbele.
Amaphoyisa adubule abulala abasolwa ababili kwathi owesithathu, oneminyaka engu-28, walimala.
UCol Mbele uthe le ndoda iphuthunyiswe esibhedlela lapho igadwe khona ngamaphoyisa.
Udalule nokuthi iphoyisa elilimalile liphuthunyiswe esibhedlela kodwa lisesimeni esithembisayo.
Amaphoyisa ashaqe izibhamu ezimbili nemoto ebihamba abasolwa, konke okuzoyohlolwa ukuthi akukaze kusetshenziswe ukwenza ezinye izenzo zobugebengu.
UCol Mbele uthe amaphoyisa aphenya icala lokuzama ukubulala nawokushona kwabantu.
“Akhona amanye amacala azothweswa umsolwa ngokuhamba kwesikhathi,” kusho uCol Mbele.
Okhulumela uphiko oluphenya izenzo zamaphoyisa, i-Ipid, uNksz Grace Langa, uthe ithimba labo libizelwe endaweni yesigameko ngo-2.10 entathakusa yayizolo. Uthe luyaqhubeka uphenyo.