Ingwadla kowezemfundo zingavalwa izikhala
UKUQHUBEKA nokunciphiswa kwesabelo sezimali kuMnyango wezeMfundo KwaZuluNatal ngoR9 billion okulindeleke ukuthi kwenzeke ngonyaka ozayo, nangoR11 billion ngo-2023 kungadala ukuthi kudilizwe othisha njengoba ingekho nemali yokuvala izikhala ezikhona kulo mnyango.
Lokhu kuvezwe yibamba lenhloko yomnyango uDkt Barney Mthembu, othe ukunqanyulwa kwesabelo salo mnyango ngoR6.3 billion kulo nyaka wezimali, kudale enkulu inkinga. Uthe inkinga ababhekene nayo bayidlulisela kumgcinimafa noNdunankulu wesifundazwe, uMnuz Sihle Zikalala.
“Uma sikhala ngokunqanyulwa kwesabelo sezimali sisuke singadlali ngoba lokhu kusishaya ngqo. Imali kulo nyaka inciphiswe ngoR6.3 billion, ngonyaka ozayo kumele inciphiswe ngoR9 billion, kuthi ngo-2023 kube nguR11 billion. Yimali enkulu le uma ubala ukuthi eminyakeni emithathu isabelo sizobe sinqanyulwe ngoR26 billion,” kuchaza uMthembu.
Wathi kumanje ziningi izikhala ezingavaliwe ngoba imali ayikho.
“Ziyinqwaba izikhala esingazivalile emnyangweni. Zifaka abahloli, kwezinye izindawo othisha abebezovala izikhala ngakho ukunqanyulwa kwemali. Uma isimo siqhubeka siba nje, singagcina ngokuthi sidilize singabe sisaqasha ngoba sizobe singenayo imali.”
Uthe kodwa banethemba lokuthi isimo sizolungiseka.
“Sibeke ithemba lethu kumgcinimafa ukuthi uma esenza isabelo esibuyekeziwe, uzosicabangela. NoNdunankulu mkhulu umsebenzi awenzayo kulolu daba lwemali.”
Izinyunyana zothisha zike zakhala ngokungavalwa kwezikhala zothisha abasuke beye emalivini ngenxa yokushoda kwemali.
NoNgqongqoshe woMnyango uMnuz
Kwazi Mshengu, ukhale kakhulu ngalesi simo ababhekene naso. Kuthiwa kunezikhala ezibalelwa ku-2 000 zothisha ezingavaliwe ngenxa yokushoda kwemali.