I-ANC ayinavalo ngokhetho phezu kwenkinga yemali
I-ANC ithi ayinalo itwetwe lokuthi izinkinga zemali eziyikhungethe, zingase ziphazamise umkhankaso wayo wokhetho lohulumeni basekhaya.
Izolo le nhlangano yethule izinhlelo zokukhankasela ukhetho lwangoNovemba 1. I-ANC yethula lezi zinhlelo nje, inezinkinga zemali eseziholele ekutheni abasebenzi bayo bangaholi ngesikhathi.
NgoLwesithathu inhlangano ivulelwe icala lokweba, ukukhwabanisa nelenkohlakalo ngenxa yezinsolo zokuthi ibingayifaki esikhwameni esibhekelele abangasebenzi, imali ebiyibamba emiholweni yabasebenzi bayo.
Kunovalo lokuthi abasebenzi abanganelisekile, bangase bahudule izinyawo uma inhlangano isikhankasela ukhetho njengoba sebeke bateleka, bekhala ngokungaholelwa ngesikhathi.
Kepha oyinhloko yezokhetho kule nhlangano, uMnuz Fikile Mbalula, uthe kabathukile nakancane. Uthe kuzokube kungekhona okokuqala bekhankasa, beqhugela ngakwezemali.
“Izinkinga zemali azizintsha kwi-ANC. Uma uzoqaphela ngokhetho olwedlule saba ngabokugcina ukufaka izinqwembe zasemigwaqweni ngenxa yenkinga yemali. Ngaleso sikhathi ngisho amaqembu angoqhibukhowe, ayesezifakile izinqwembe kodwa thina sasingenazo.
“Izinkinga zemali aziqali namhlanje kwi-ANC. Nithuswa wukuthi u(Mnuz
Carl) Niehaus (osanda kuxoshwa njengomsebenzi we-ANC) akakhokheliwe?
Asiqali ukubhekana nalesi simo. Ekugcineni sakwazi ukunqoba ukhetho. Nakulokhu asikungabazi ukuthi sizolunqoba ukhetho. Sizosebenzisa lokho okuncane esinakho ukukhankasela ukunqoba,” kusho uMbalula, ngokuqhosha.
Uqhube wathi bathembele kakhulu kwiminikelo ezophuma kumalungu enhlangano ukuze bakwazi ukukhankasela ukhetho. UKhongolose uzokwethula umqulu wezithembiso zokhetho ngoSepthemba 27, eTshwane. NguMengameli we-ANC, uMnuz Cyril Ramaphosa, ozokwethula umqulu.
UMbalula uthe lo mcimbi ngeke uhanjelwe ngabantu abaningi njengoba kusadlange ubhubhane, iCorona.
Umkhandlu iTshwane, ungomunye wemikhulu i-ANC eyahluleka ukuyinqoba ngokhetho lohulumeni basekhaya, olwedlule. UMbalula uthe bazimisele ukuyibuyisa le mikhandlu.
Le nhlangano izokwethula umqulu wezithembiso nje, isabhekene nezinkinga zangaphakathi ngoba amalungu asaqhubeka nokufaka izikhalazo ngendlela okusingethwe ngayo uhlelo lokuqoka abayizomela okhethweni.
UMbalula uthe inhlangano iyaqhubeka nokuxazulula lezi zikhalazo, wathi ezinye zazo zizoxazululwa ngemva kokhetho. Uthe inkinga enkulu wukuthi sekukhona nemidlwembe efaka unyawo lwedada ekuqokweni kwabazomela i-ANC okhethweni.
“Yebo, ezinye zezikhalazo ziyezwakala kodwa kwezinye izindawo sidlala nje imidlwembe exova imiphakathi. Abanye babo bakufuna ngenkani ukuba ngamakhansela. Kabafuni ukwamukela ukuthi imiphakathi ayizange ibakhethe, manje sebehamba bedala uthuthuva.’’