Umndeni udalula isifo esinqobe iphini likangqongqoshe
UMNDENI wePhini likaNgqongqoshe eHhovisi likaMengameli, uSolwazi Hlengiwe Mkhize, udalule isifo esilinqobile. USolwazi Mkhize ushone izolo ekuseni, esibhedlela esiseGoli. Wangeniswa sibhedlela ngo-Agasti 31. Umndeni uthi uSolwazi Mkhize uthathwe wumdlavuza wephaphu.
Ngokwesitatimende somndeni, uSolwazi Mkhize ubesephile nalesi sifo kusukela ngoMashi, 2017.
“Indlela abhekane ngayo naso isifo ibisinika ithemba,” kusho isitatimende.
USolwazi Mkhize ubeyiphini likangqongqoshe eHhovisi likaMengameli eMnyangweni obhekelele izidingo zabesiFazane, Intsha nabaphila nokuKhubazeka. Ngaphambi kokuthi ajutshwe kulo mnyango, uke waba wungqongqoshe woMnyango wezeMfundo ePhakeme, waphinde waba ungqongqoshe woMnyango wezaseKhaya.
Ngaphambi kwalokho, ube yinxusa lakuleli emazweni angaphandle, wayengomunye wokhomishana kwiKhomishini yamaQiniso nokuBuyisana. Ugcine ukubonakala esidlangalaleni ngenyanga eyedlule iPhalamende liqoka uSomlomo, uNkk Nosiviwe Mapisa-Nqakula.
Izinhlaka ezahlukene zikahulumeni namaqembu ezepolitiki achaze uSolwazi Mkhize njengeqhawe. UMengameli Cyril Ramaphosa, uthe kuwe insika.
“Silahlekelwe. Amagalelo akhe ayaziwa ezinhlakeni ezahlukene. Waklama indima kwezokubuyisana kuleli.
“Ulwele amalungelo ezingane ezihlukumezekile, abesifazane abacindezelekile, namalungelo abantu jikelele.”
UNdunankulu waKwaZuluNatal, uMnuz Sihle Zikalala, uthe lesi sifundazwe silahlekelwe ngokushona kwalo solwazi odabuka eNkandla.
“Impilo yakhe yonke uyichithe ezama ukushintsha impilo yabantu. Iqhaza lakhe ligqame ekulweleni amalungelo ezingane nabesifazane.
USolwazi Mkhize wayeyibambe noMbhishobhi Desmond Tutu kwiKhomishini yamaQiniso noBuyisana,” kusho uZikalala.
I-ANC ithe igqemeke engeqiwa ntwala. USolwazi Mkhize ubeyilungu lesigungu esiphezulu kule nhlangano. Okhulumela i-ANC, uMnuz Pule Mabe, ufanise uSolwazi Mkhize nesishoshovu esingasekho, uNkk Charlotte Maxeke.
Okhulumela iSACP, uDkt Alex Mashilo, uthe amagalelo kaSolwazi Mkhize kawabuzwa.
Okhulumela i-IFP, uMnuz Mkhuleko Hlengwa, uthe bashaqekile.
“Uyimele ngeqiniso inhlangano yakhe kusukela engena ePhalamende ngo-2009.”
USolwazi Mkhize ushiya umyeni wakhe, uMnuz Pat Mkhize, izingane ezine nomzukulu.