Bazothola nochatha kakheshi benyuselwa amaholo
BAZONYUSELWA umholo ngo-3.5% abasebenzi bomasipala kuleli emuva kokusayinwa kwesivumelwano samaholo yiSouth African Local Government Association (Salga) nezinyunyana.
Uchatha bazowuthola iminyaka emithathu emuva kwalesi sivumelwano esithathwe emkhandlwini wezingxoxo.
ISalga emele omasipala abangu-257 kuleli ithe izingxoxo zidonse isikhathi eside futhi zike zafinyelela kwangqingetshe.
Lezi zingxoxo ziqale ngoMashi phakathi kweSalga nezinyunyana iSouth African Municipal Workers Union (Samwu) ne-Independent Municipal & Allied Trade Union (Imatu).
“Lesi sivumelwano eseminyaka emithathu, uma ngomuso kudingeka ukuthi sisibuyekeze ngenxa yezimo zomnotho sizokwenza kanjalo.”
Abasebenzi bazothola uchatha ozokhokhwa uqale kusukela kuJulayi 1, 2021.
“Abasebenzi bazothola uchatha kakheshi kanye. Labo abahola uR12 500 noma ngaphansi bazothola uR4 000. Abahola ngaphezu kukaR12 500 bazothola uR3 000.”
ISalga ithe lesi sivumelwano sizosiza wonke umuntu ngoba nalabo masipala abadonsa kanzima bazokwazi ukuphefumula.
Ithe bekungelula ukuthi kufinyelelwe kulesi sivumelwano njengoba izingxoxo zafinyelela kwangqingetshe, kwaze kwalethwa umxazululi.
ISalga ithe lesi sivumelwano sizoletha uzinzo kulo mkhakha futhi ngeke kube nesidingo sokuthi minyaka yonke kube nezingxoxo zamaholo.
I-Imatu ivumile ukuthi sisayiniwe isivumelwano samaholo.
IPhini likanobhala jikelele kwiSamwu uMnuz Dumisane Magagula, lithe balindele ukuthi bonke abasebenzi bathole imali yabo nomholo ka-Okthoba, ikhokhwe isukela kuJulayi 1.
Izigxoxo ziqale ngokuthi iSamwu yayifune ukunyuselwa amaholo ngo-7%, i-Imatu yona yayifune u-9%.