Abashelwe yindlu bakhala ngamanzi
BAKHALA ngompompi abangaphumi amanzi abomndeni wakwaNgcobo oSindisweni, ngaseVerulam, abashelwe yindlu, konke obekukuyo kwaba wumlotha.
Lo mndeni uthi kwasiza omakhelwane nabafana bendawo abasuka enkundleni yezemidlalo ababalekelela ngokulanda amanzi komakhelwane nakuba kwagcina kushe indlu engurawondi kuphela.
Bathi kule ndawo, amanzi kawaphumi kompompi kodwa alethwa ngezimoto eziwathwalayo kanti baphila ngokuthi bagcwalise imiphongolo ukuze bahlale benawo.
UNksz Ntobe Ngcobo okwasha indlu yakhe wasala nayekugqokile, uthe ubengekho ngoMgqibelo odlule ngesikhathi kusha indlu yakhe ebinemibhede emithathu, u-wardrobe obunezimpahla zakhe nezikanina, ukudla nezinye izimpahla zasendlini.
Uthe unina wezwa kunuka sengathi kukhona okushayo kule ndlu eyayingenamuntu waya kobheka, wangabona lutho kanti kwabe sekuqhamuka intuthu sekusha.
“Sasizwa ngomakhelwane namanye amalungu omphakathi, ngoba kwavele kwafika abafana bendawo ababedlala ibhola, basisiza ukuthi kulandwe amanzi nakweminye imizi ukuze kucishwe umlilo. Kwasha konke okwakuleya ndlu, mina ngasala nengangikugqokile,” usho kanje.
Emuva kokushelwa yindlu, usomabhizinisi waseNanda, uMnuz Sbu Mjwara, weSbu Fruit and Veggie, ube esenikela ngegilosa kuwo ehambisana noMnuz Mthembiseni
Thusi wenhlangano Ubunye bamaHostela beyowuxhasa.
UMjwara uthe njengoba esebenza nomphakathi ungumuntu owelula isandla uma kudingeka.
“Siphila esikhathini esinzima lapho abantu belahlekelwe yimisebenzi ngenxa yeCorona, kwaphinde kwaba khona nezibhelu, isimo saba sibi kakhulu kodwa lokhu akusho ukuthi thina esisenakho okuncane singabelani nabanye,” kusho uMjwara.
UNksz Kholoshi Xaba ongunina kaNksz Ngcobo, ubonge kakhulu kuMjwara noThusi ngosizo ababalethele lona wathi namanje usazibuza ukuthi umlilo wawuqhamukaphi?
“Esikubongayo ukuthi kwenzeka emini, futhi akekho owalimala kulo mlilo.”