Simi ndawonye siyisizwe esinsundu ekubeni sinamasiko anothile
SIYADINGA ukupeqululwa ugongolo,ubhici namankemfu lapho sidloba ngomfutho ezintweni ezingasiyisi ndawo.
Kuhlala kukhalwa ngohlaka lwezemfundo ngoba lubukeka luyinto emi ndawonye engalinothisi ikhanda kepha iyalicindezela ligcine likhongozela emthonjeni owodwa. Ngakuphi kokuthi nalo isiko limi ndawonye ikakhulukazi elabansundu, sibhekene nengwadla uma kukhulunywa ngentuthuko yesiko.
Uma ungabheka amazwe asentshona ayaqinisekisa ukuthi ayawunameka umlando wawo ngokuwuqopha maqede awulonde.
Kulawa mazwe kulondwa ngisho ukhezo olwaludla isihlabani sakuleso sizwe kuze kubhekwe ngisho indlela ayecabanga ngayo lowo muntu kwakhiwe isimongqondo ngaye nomoya wakhe ukhonzwe zizukulwana.
Bawathuthikisa kanjalo-ke amasiko abo ngoba athi ethuthukiswa ngokuhamba kweminyaka kodwa ebe exhumekile emisukeni yawo.
Inkinga ngawethu amasiko afihlwa ngabantu abadala ababenengeka uma bebuzwa imibuzo ngosiko nesiko.
Uma kufika isizukulwana esilandelayo siqhubeka nesiko esingenako ukuqonda ngalo.
Kubuhlungu ukuthi simi ndawonye siyisizwe esinsundu ekubeni sinamasiko acebe kangaka.
Le nto yokunqwaha nenqubekela phambili egameni lesiko silenze isinkonkonko sesimbelambela, ngeshwa isizukulwana esilandelayo siyohluleka wukuqhubezela phambili amasiko uma singachazelwanga ngobumqoka bawo. Uma siqhubeka nokwenza isiko lethu inunu yokwethusa ukuze bahlabe izinkomo, akukho lapho siyoya khona.
Uma isiko lethu kuzoba ngamabheshu, amahwu nezinduku nokusakaza umhlabathi ngonyawo siyogcina ngakho ukuthwetshulwa izithombe emicimbini kodwa sibe singenawo umthelela.
Uma njalo ngonyaka sizokhuluma ngokuthi okhokho bethu babephila kanjani kodwa kube kungekho esikufundayo kuleyo milando ukwenza umahluko kwinamuhla, siyazidlalela nje.
Sidinga ukuhlangana sidingide imilando yamasiko nemisuka yawo.
Masikutuse okuyikho nokusengasebenza kwinamuhla, siphinde sikuhlabe sikuhlikize okusenza sibukeke njengezilwane.
Ngiphatha igama lezilwane ngoba kunomehluko phakathi komuntu naso hhayi ngoba sidelelekile.
Amaphutha ahlala ekhona kuzo zonke izigaba zokuphila - kusukela sibancane senza amaphutha okukhula, nalapho sesivuthwa emakhanda kuba nezinselelo zakhona eziba nengcindezi ebangela ukuthi kube neziphambeko.
Kanjalo-ke nangamasiko ethu akhona ayemahle ngokwesikhathi kodwa angasangeni athi khaxa ngokwesikhathi.
Uma siphoqelela ukugcinwa kwamasiko angavumelani nesikhathi nendawo sizobhekana nenkulu ingcindezi yokuba ngomva kwezinye.
Njengoba sibhekene nempi kagimbici kufanele ngabe sesinendlela entsha yokuhlamba izandla ngomswane ukuze singathelelani ngalesi sifo njengokuthi kwakhiwe isigubhu esincane esizopotshozwa njalo uma kumele kuhlanjwe izandla emva komngcwabo.
Singalivuselela futhi isiko elithi makube ngumndeni kuphela oba khona ekuthunweni kwelungu, bambeke ngehubo lomndeni.
Empeleni lesi sikhathi esikuso sisibeka ethubeni elingconywana lokubhekisisa lokho esingaphila ngaphandle kwakho.
Yonke iminwe isikhomba ekhaya, kuthe lapho singasakwazi ukuya emasontweni ikhaya kwaba yiyo kuphela indawo ongaphephela kuyo.
Imvelo isipha eziningi izimpawu kepha thina kasifundiseki.
Njengamanje kumele ngabe simatasa sicwaninga imisuka yethu ngenhloso yokwakha isiko elisha elizosivikela ekushwabadelweni ngamasiko ezinye izizwe.
Lokhu kumele sikubheke njengefa okumele silishiyele izingane.
Ingozi enkulu ngesiko uma lingalondwanga ngendlela eyiyo, wukuthi amankentshane avuka ame ngezinyawo abhebhethekise indideko ngoba efuna ukuqola adle abantu bephila.
Isiko lakhiwa yithi ngokufunda emvelweni nakulabo abasandulela.
Imvelo ayikaze iwaqambe amanga ngakho masifunde kuyo senze okufanele.