Eyabamatekisi nabagibeli mayilungiswe ngesinono hhayi ngobubhoklolo
KUKHATHAZEKA noma yimuphi usomabhizinisi uma kukhona okungahambi kahle ebhizinisini lakhe noma okuliphazamisayo ekutheni lithuthuke.
Akufanele kodwa izinyathelo ezithathwa yilowo somabhizinisi, ukuvikela ibhizinisi lakhe, kube ngeziphula umthetho noma ezihlukumeza amalungu omphakathi.
Yingakho sikhala ngesimo esibikwa ngabantu baseMnambithi abasebenzisa usosesheni iKlipriver, ababika ngezigameko zokuhlukunyezwa ngosomatekisi.
Kule ndawo abantu bakhala ngokuthi osomatekisi baqale umkhankaso wokudiliza abagibeli ezimotweni ezincane kanti okubakhalisayo wukuthi basongela nabahamba bewumndeni emotweni eyodwa.
Bathi bakwenza lokhu ngoba bekhala ngokuthi ukugibelisana ezimotweni ezincane kulimaza ibhizinisi labo.
NoSihlalo walo sosesheni, uMnuz Bhekuyise Masondo, ukuvumile ukuthi bawuqalile lo mkhankaso, waphika kodwa ukuthi badiliza nabomndeni owodwa abasemotweni njengoba kusho abakhulume neSolezwe bekhala ngalo mkhankaso.
Kuhle ukuthi osomabhizinisi, njengabo osomatekisi, bahlale bebheka indlela yokusebenza nokuthola izisombuluko ezinselelweni abahlangabezana nazo.
Kepha akufanele futhi siyakugxeka ukuthi lokhu kwenziwe ngendlela ezohlukumeza omunye umuntu futhi ehambisana nobubhoklolo.
Liyezwakala iphuzu lokuthi umuntu ogibelisa abantu emotweni yakhe bese ebakhokhisa, uyashayisana nomsebenzi wezithuthi zomphakathi. Okungezwakali kodwa wukuthi kutshelwe ngisho amalungu omndeni ukuthi angagibelisani.
Osomatekisi, usosesheni, uMnyango wezokuThutha KwaZulu-Natal nezinhlaka zezokuthutha kumele zisibhekisise lesi simo esibikwa eMnambithi sinqandwe kungaze kuqubuke udlame olungenasidingo le mboni edume ngalo.