UDludlu uzimisele ukukhuphula igama labaqeqeshi besifazane
UZIMISELE ukubeka induku ebandla nokuphakamisa igama labaqeqeshi besifazane bebhola lezinyawo osanda kuqokwa njengomqeqeshi omusha weqembu labesifazane leTshwane University of Technology (TUT), uSimphiwe Dludlu.
Leli qembu, eligijima kwiHollywoodbets Super League, uzolifica lihleli endaweni yesibili kwi-log ngamaphuzu angu-33 emuva kwemidlalo engu-15.
UDludlu (33) unomlando omuhle ebholeni njengoba aqala njengomdlali waze wafika ezingeni lokudlalela iqembu lesizwe ngaphambi kokuba aqale ukuqeqesha.
Ukusebenzisana nabaqeqeshi besifazane abanjengoSheryl Botes no-Anna Monate yikho okwamnika intshisekelo yokwenza izifundo zokuqeqesha engakawabeki nasethala amakhokho.
"Ngisho ngisewumdlali bengiwumuntu othanda ukubeka imibono kwazise bengihlala ngingukaputeni emaqenjini ebengiwadlalela," kuqhuba uDludlu. "Emuva kokudlala ngaphansi kwabaqeqeshi besifazane, ngabona ukuthi yinto engingathanda ukuyenza nami.
"Ngenza izifundo zokuqala zokuqeqesha ngisadlala kwiBanyana Banyana. Ngabuye ngaqhubeka ngathola iCAF B Licence ngo-2012, i-Uefa B Licence ngo-2013, ngo-2014 ngenza iCAF A Licence.
"Nasesikoleni ngafundela into ehlangene nezemidlalo ngathola iziqu zeSports Science e-University of Pretoria."
Ukuzimisela kukaDludlu kwenza ukuthi aqokwe njengomqeqeshi weqembu lesizwe labesifazane abaneminyaka engaphansi kwengu-17, aBantwana, walifaka kwiNdebe yoMhlaba yango-2018.
"Lokho ngikuthatha njengophaphe olubalulekile esigqokweni sami futhi kwangigqugquzela kakhulu ukuthi ngifise ukwenza okungaphezulu. Kuningi engakufunda futhi ngiyathanda ukusebenza nabadlali abancane.
"Ngikholwa ukuthi luningi ulwazi enginalo okumele ngiludlulisele kulaba abasadlala futhi ngibona ukuthi kuhle ukuthi bafundiseke besebancane. Njengoba iqembu lesizwe lingadlali njalo, ngiqome ukuthatha lo msebenzi wokuqeqesha iTUT ngoba uletha inselelo ehlukile,“kusho uDludlu.
UDludlu uzoqala umsebenzi omusha kwiTUT ngomdlalo onzima. Bazobhekana nompetha, iMamelodi Sundowns, kusasa.
"Kuyangijabulisa ukunikwa ithuba lokuqeqesha esigabeni esikhulu futhi ngikhuthazwa nawukubona abanye abaqeqeshi besifazane beyibambile emaqenjini ehlukene.
"UThina Mbuli wenza umsebenzi omuhle kwiUWC, kanjalo no-Anna Monate kwi-UJ noCiara Picco kwiJVW. Kuyajabulisa ukubona isibalo sabaqeqeshi besifazane abasezingeni eliphezulu sikhuphuka.
"Ngizimisele ukuthi nami ngifike ngikhombise ulwazi lami lwebhola, ngilithuthukise iqembu. Ngilifice lenza kahle futhi angizimisele ukuthi ngibhidlize. Nginabadlali abahle futhi ngilindele ukuthi sithole imiphumela emihle.
"Umdlalo engizoqala ngawo uzobe unzima kodwa kulesi sigaba awukho umdlalo olula. Ngijabulela ukuthi ngizothola ithuba lokubona abadlali bami kahle bedlala neqembu eliyingozi njengeSundowns."
Ngaphandle kokuba ngumqeqeshi, uDludlu uphinde abe ngumhlaziyi webhola kwiSuperSport, akhulise nezingane zakhe ezimbili.
Noma kungelula ukukwenza konke, ubonga umyeni wakhe nomndeni wakhe ngokumeseka.
"Ngabe ngenza iphutha uma ngingambongi umyeni wami ngokuba wusizo ngayo yonke indlela empilweni yami.
Ngiyawubonga nomndeni wami, angiboni ukuthi bengizophumelela ngaphandle kwabo," kusho uDludlu.