ULarsen nesizathu sokusayinisa abachithwe ngawePSL
UMQEQESHI weSummerfield Dynamos, uClinton Larsen, uveza isizathu esimenze wasayinisa iningi labadlali abachithwe ngamaqembu ayibamba kwiPremier Soccor League (PSL).
NgeSonto eledlule, iDynamos edlala kwiSafa KZN Motsepe League, idlale ingcwenga yebhola ishaya iHappy Wanderers neStone Breakers kaThami Ngubane emidlalweni yokuhlungela ukungena ku-Last 32 yeNedbank Cup.
Kusasa izobhekana ne-Ethekwini Coastal esigabeni esilandelayo sokuhlunga ngo-2 ntambama, eChatsworth Stadium.
Emilenzeni yokuqala iCoastal ishaye iXI Experience neGWP Friends.
Ozonqoba phakathi kweDynamos neCoastal uzobhekana neMidlands Wanderers kowandulela owamanqamu ngoLwesithathu. Owamanqamu uzodlalwa ngoMgqibelo ozayo.
EzikaLarsen olekelelana noMafa Zuma noClaud Tarim, zisayinise uThabo Molefe owake wadlala kwiLamontville Golden Arrows, Sandile Zuke owazakhela igama kwiKaizer Chiefs. Kukhona noLucky Nguzana owake waba emabhukwini eMamelodi Sundowns, Arrows, ne-Umraniyespor yaseTurkey.
Abanye uDeolin Mekoa owadlala kwiMaritzburg United nakumaOlympic Games ango-2016, noBrandon Parusnath oke waba emabhukwini
Abafana Bes'thende.
ULarsen oke waqeqesha amaqembu adlala esigabeni esikhulu kwiBloemfontein Celtic, Maritzburg, Arrows, nePolokwane City, utshele Isolezwe ukuthi uzinike isikhathi ngaphambi kokusayinisa laba badlali.
"Laba badlali balaxazwe ngamaqembu ePSL ngoba mhlawumbe ebona ukuthi sebephelelwe ushatini. Mina kangibonanga kanjalo, lukhulu abazolwenzela iDynamos. Angibasayinisanga ngoba ngibazwela. Okuhle ukuthi iningi labo ngisebenzile nalo kwiPSL. Ukufika kwabo kwenzele ithimba labaqeqeshi beDynamos umsebenzi waba lula. Bawusizo olukhulu ekunikeni iningi labadlali bethu abasebancane amasu. Nakuba usemningi umsebenzi kodwa ngineme ngendlela iqembu eliyiyo," kusho uLarsen.
Mayelana nokungena kwiLest 32 yeNedbank Cup, uthe: "Kungasijabulisa impela ukungena kwi-Last 32 yeNedbank kodwa kasinangcindezi yakho. Empeleni sijatshuliswa ibanga esesilihambile kulo mqhudelwano. Empeleni imidlalo yeNedbank iyingxenye yamalungiselelo eligi. Akukho okunye, silwela ukuya kweyokuhlunga. NakoweCoastal sizoqhubeka nokulwela ukudlala kahle.“
Omunye umdlalo ngoMgqibelo uphakathi kweNewcastle All Stars neMuzi King Masters ngo-2, eParadise Stadium.