OweChippa uwafuna egcwele kwiPirates

INJINI yeChippa United, uSammy Seabi, ifuna babhukule ngokuphindiwe ozwakabo ukuze behlule i-Orlando Pirates.

IChilli Boys izokwamukela eZimnyama emdlalweni weDStv Premiership eNelson Mandela Bay Stadium, eBhayi, kusasa ngo-3 ntambama.

Leli qembu eliholwa ngumqeshi, uGavin Hunt, lizongena enkundleni liphikwa wumlando kwazise sekuneminyaka lagcina ukwehlula iPirates.

Emidlalweni engu-10 yakamuva, iPirates izidlele amahlanga kubafana bakaSiviwe Mpengesi. IChippa yagcina ukuwina kwiPirates emdlalweni weligi ngo-2016, iyixebula ngo-2-0.

USeabi ukholwa wukuthi bangamelana nePirates.

"Kuningi umqeqeshi asitshela khona ngendlela okufanele sidlale ngayo, amaqhinga esizowasebenzisa nokufanele sikuqaphele.

“Sizodlala neqembu elihle kakhulu, i-Orlando Pirates. Ngakho sibheke lukhulu eqenjini lethu, kubadlali bethu nakuwona wonke umuntu, nakimina uqobo. Kufanele sibe ngamadoda, siyibambe ishisa.

“Singaphumelela ukukwenza lokho. Sesike sakwenza. Ngiyakholwa ukuthi singakwenza futhi ngoMgqibelo," kusho uSeabi obeyibamba kwiMamelodi Sundowns.

IChilli Boys izobhekana nePirates inengcindezi yokubuyisa isithunzi kulandela ukuthola isibhaxu sika-1-0 kwiRoyal AM ngempelasonto edlule.

Bekungokokuqala uHunt ehlulwa selokhu efikile kwiChippa. Inamaphuzu amane emidlalweni emithathu yeligi.

"Kubaluleke kakhulu ukuthola amaphuzu amathathu. Kuzokwenyusa umfutho nokuzethemba kwethu ngoba siphuma emdlalweni esehluliwe kuwona. Kufanele sibuyise isithunzi, sibuyele emgqigqweni wethu wokuwina.

“Ngiyakholwa wukuthi sesiyazi ukuthi siyilahle kuphi emdlalweni odlule futhi yikuphi esikwenze kahle. Manje silungiselela ukubhekana nePirates.

“Ngikholwa wukuthi siwulungele umdlalo," kusho uSeabi.

IPirates, enqobe umdlalo wayo odlule ishaya iSwallows ngo1-0, kulindeleke ukuthi iqhubeke nokubophela uSiyabonga Mpontshane emapalini.

Leli qembu limemezele kwi-website yalo ukuthi unozinti wokuqala, uRichard Ofori, usakhala ngezinhlungu ngemuva kokulimala edlala neqembu lesizwe lakubo, iGhana, emasontweni amabili edlule. UMpontshane ubesezintini koweSwallows.

Imidlalo yeDStv Premiership yangempelasonto:

Kusasa - Ngo-3pm: Chippa United v Orlando Pirates (Nelson

Mandela Bay Stadium).

Ngo-5pm: Cape Town City v Stellenbosch (Athlone Stadium); Baroka v Sekhukhune United (Peter Mokaba Stadium);

Kaizer Chiefs v Royal AM (FNB Stadium).

NgeSonto - Ngo-3pm: Swallows v SuperSport United (Dobsonville Stadium).

Ngo-5pm: Mamelodi Sundowns v TS Galaxy (Loftus Versfeld).