UMbuso Khoza nezinhlelo zokuzinza kwithelevishini
UMCULI ophinde abe yisazi samasiko esintu, uMbuso Khoza, uthi uzongena agamanxe emidlalweni yethelevishini.
Lo mculi ungomunye wabalingisi bomdlalo omusha, Umkhokha, ozoqala kwiMzansi Magic ngenyanga ezayo.
Ngaphambi kwawo, uke wavela eyijaji elagweba uKaMadonsela (Brenda Mhlongo) kwiMbewu futhi uke wabonakala nakuZalo.
"Kusho lukhulu kimi ukuthola amathuba afana nalawa, kuwubufakazi bokuthi ukusebenza ngokuzikhandla kunomoya wakho. Ubaba angimazi ngisho esithombeni. Ngafundiswa wumuntu ongakwazi nokubhala igama lakhe, lokhu ngibona kuwukunqoba izimo zempilo nokudlondlobala," kusho uMbuso.
Uthe manje wenza ucwaningo ngezindaba zakudala ukuze ezozibhala zibe yimidlalo yethelevishini ngoba akafuni ukugcina njengomlingisi.
Ukulingisa uthi yinto azifundise yona esevele esemculweni.
"Ngibonile ukuthi ukucula akuyona into ekugcina isikhathi eside, kudingeka amanye amathuluzi alekelela isiphiwo.
“Kube nzima kakhulu ngoba ngenxa yeCovid-19, awukwazi ukwenza umcimbi ukuze ukhokhele indawo oyiqashile ngoba siklamelwe inani elincane lababukeli.
“Ngibe sengizihlupha ngazifundisa okuningi kodwa ngasizwa nawuMondli Makhoba noSibonile
Ngubane. Inhloso yami kube wukubuka izinto ezidlala kwithelevishini.
“Uma kuthintwa usikompilo nolimi, akucacile kahle ukuthi kuthengiseke ulimi lwesintu. Ngenkathi ngigqugquzela ulwazi lwesintu namahubo, ngashayelwa ucingo wuMandla KaNozulu, engimema emdlalweni wabo ngoba uthinta isintu kakhulu," kuchaza yena.
Umkhokha wumdlalo okhuluma ngemindeni emibili ebanga ibandla. UMbuso uzobe edlala indawo kaMaphalala kulo mdlalo okulingisa kuwo noSthandiwe Kgoroge, Linda Sokhulu, Nay Maps, Deli Malinga, Sibonile Ngubane ukubala abambalwa.
Uzoqala ukukhonjiswa ngo-Okthoba 3 ngo-8 ebusuku.
UMbuso uthe ngaphandle kokulingisa, umatasa ngezinhlelo zokwakha isikole sobuciko.
"Sifundisa ngemvelaphi njengokuthi uma ufuna ukwenza umemulo ufunde izinsuku ezinhlanu ngezinto okumele uzenze."
Uveze ukuthi ngo-Okthoba 8, uzohambela amazwe aseEurope eyokhuluma khona ngesintu futhi kunomsebenzi awuqopha neqembu lomculo lakwelinye izwe. Uveze ukuthi uzokhipha i-albhamu yomculo wokholo, enye ehambisana nencwadi esihloko Injadu Yomhambi bese kuba nenye ye-jazz athe uNduduzo Makhathini, usayididiyela.