Bashaywe baze bafa besolwa ngokweba
BATITINYWE wumphakathi baze bashona abesilisa baseMzimkhulu ababili okuthiwa babanjwe oqotsheni bentshontsha izimbuzi kule ndawo ngoLwesibili.
Ngokuthola kwaleli phephandaba, abesilisa abayisithupha abebehamba ngeveni babonwe ngabafundi abebesesikoleni, bentshontsha izimbuzi ebezingeluswe muntu zisentabeni ephakathi kwezigodi ezimbili zakule ndawo, okuyiseNdabayilali ne-Antioch.
"Bekusaphele amasonto amathathu le moto ifike kule ndawo yashaqa izimbuzi eziyishumi endaweni efanayo. Nakuqala abafundi bayibona kodwa yakwazi ukubaleka. Kulokhu bese kuhleliwe ukuthi uma bebuya kuzovalwa umgwaqo bangakwazi ukuphuma," kusho umthombo okule ndawo.
Uthe lawa madoda, abevele esezilayishile izimbuzi evenini, athe uma ebona ukuthi umgwaqo uvalwe ngamatshe, azama ukuhamba eceleni kwawo, imoto abehamba ngayo yalimala amathayi yangabe isakwazi ukuhamba.
"Abaleke ngezinyawo aya ngakwesinye isigodi kanti nakhona asekakiwe, kwagcina kubanjwe ababili, abane babaleka. Laba ababili bale baphetha ukusho ukuthi bathunywe ngubani nokuthi bangabakuphi okuholele ekutheni umphakathi udinwe kakhulu, ubashaye baze bafe. Baphendule ngokuthi umuntu obathumile ngumuntu umphakathi ongeke umenze lutho. Imoto yabo, ebikhishwe izinombolo, nayo ishiswe yiwo umphakathi obudiniwe," kuchaza lo mthombo.
Inkosi yendawo, uMnuz Nkosiyezwe Msingaphansi, ithe umkhuba wokwebiwa kwemfuyo kule ndawo udlangile.
"Lezi zigameko ziyabikwa emaphoyiseni kodwa akuboshwa muntu, engicabanga ukuthi yikho okuthukuthelise kakhulu umphakathi," kusho yena. UBrigadier Jay Naicker, okhulumela amaphoyisa KwaZuluNatal, usiqinisekisile lesi sigameko, wathi amadoda amabili abulewe kulesi sigameko aneminyaka elinganiselwa kwengu-30.
"Kuvulwe icala lokubulala eliphenywa ngamaphoyisa aseNtsikeni, okwamanje bekungakaboshwa muntu," kusho uNaicker.
THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.