Kufunwa ’obulale’ intombi ngokuyishisa
KUTHUNGATHWA isoka lowesifazane waseGugulethu, uNksz Jacqueline Mpontsana, ngezinsolo zokumbhunyela ngophethroli laqeda lamokhela ngomlilo, washona.
Okhulumela amaphoyisa, uColonel Andrè Traut, uthe owesifazane oneminyaka engu40 kukholakala ukuthi ushiswe ngumuntu abethandana naye ngoMsombuluko ngo-1.50 ekuseni emuva kwengxabano.
Isigameko senzeke lapho behlala khona eNY109, eGugulethu.
Kunezinsolo zokuthi akukhona okokuqala umufi, obenezinsuku ezimbili ebuyelene nesoka lakhe, limshaya.
Kuthiwa ngaphambilini kwaze kwangenelela umshana nobabekazi wakhe.
Umzala kaNksz Mpontsana, uLuvuyo Ndzuzo, uthe kusenzima ukwamukela okwenzekile emndenini njengoba ebulewe ngesihluku esingaka.
Uthe izingane bezisengozini njengoba kuze kwaphoqa ukuba ziphule izicabha ukuze zikwazi ukubalekela umlilo obusha ubuhanguhangu endlini.
UTraut uthe: “Umsolwa ubalekile endaweni yesigameko, ubengakaboshwa. Ongaba nolwazi, angaxhumana namaphoyisa enombolweni yamahhala ethi: 08600 10111.’’
UNksz Mpontsana, ubesanda kugubha usuku lwakhe lokuzalwa ngesonto eledlule, esebenza ukuvikela umphakathi futhi enengane yentombazane eneminyaka engu-12.
Kwenzeka lokhu nje, ngoFebhuwari uLungile Nxelelwa ugwetshwe odilikajele ababili neminyaka emihlanu yinkantolo yasePalm Ridge, ngokubulala intombi yakhe, uNksz Keneilwe Pule, yaseSebokeng.
Wayidlwengula wabe eseyibulala, wokhela isidumbu sayo ngo-2019.
UNxelela wayekade esethandane noPule iminyaka emithathu. Umufi kwavela ukuthi walinyazwa kanzima esithweni sakhe sangasese nangemuva.