I-ANC nezinyathelo kwabazame ukuchibiyela uhlu
I-ANC ithi izowathathela izinyathelo amalungu abefuna ukuchibiyela uhlu lwabantu abazongenela ukhetho. Ekhuluma esithangamini sabezindaba izolo uNksz Jessie Duarte, iPhini likaNobhala jikelele, emva kokuhambisa amagama abantu abazongenela ukhetho ngoLwesibili ntambama, uthe u-46% wabantu abafolosa ngabo okhethweni lwamakhansela, ngabesifazane nabantu abasha.
Uthe kwezinye izindawo imiphakathi ibisaphambana nemigomo yenhlangano ngokuthi iqoke abesilisa, ukuthi kube yibo abazongenela ukhetho ishiya abesifazane.
“Sizozithathela izinyathelo lezo zindawo lapho kukhona abebezama ukuchibiyela uhlu lwabantu abazongenela ukhetho. Kudingeke sisuse abantu ohlwini lwabangenelayo emuva kokutholakala ukuthi babhekene namacala.
“Sithole izikhalo ngalabo okuthiwa babenamacala amathikithi ezimoto, lawa amacala mancane ukube nabo sibasusile ohlwini cishe u-90% ubungeke ukwazi ukungenela ukhetho.”
Uthe emihlanganweni yamagatsha kukhona abebezibona ukuthi kumele bakhethwe.
“Bebefuna ukukhethwa noma kungathiwa umphakathi awubafuni. Yingakho sithole inqwaba yezikhalo esisematasa nazo.
“Nalabo abebefuna ukungena ngenkani noma umphakathi ungabafuni sizobathathela izinyathelo.”
Uthe bakwazile ukungenela ukhetho kubona bonke omasipala bakuleli njengoba ekuqaleni bahluleka ukungenela kwamanye ama-ward komasipala. Uqhube wathi u-25% wamakhansela kuzoba abantu abasha, iningi labo elineziqu.
“Amakhansela ethu afaka nabantu abathandana nobulili obubodwa. Abangenele ukhetho abancane baneminyaka engu-20, omunye ungenele ukhetho eBuffalo City eGoli, omunye kuMasipala waseKouga e-Eastern Cape. Imiphakathi ibambe iqhaza ikhetha abantu ebafunayo.”
Uthe kodwa uhlelo lokukhetha izimeya komasipala abangamaMetro, luzokwenziwa yisigungu sesifundazwe hhayi isifunda.
“Sizokhetha abantu abathathu, abazophonswa ngemibuzo bese kukhethwa ofanele. Ozokhethwa kumele kube ngumuntu onamava kuhulumeni kodwa akusho ukuthi kumele kube ukuthi ubuyikhansela impilo yakho yonke. Sifuna umuntu ozokwazi ngezezimali, azi ngeANC bese azi ngedolobha lakhe. Akukwazi ukuthi ungathi uhlala eThekwini ufune ukuba yimeya yaseGoli.”