I-IFP ihlonipha uButhelezi ngokhetho

I-IFP ihlele ukusebenzisa ukhetho lwamakhansela olungoNovemba 1 ibonge uMntwana waKwaphindangene uMangosuthu Buthelezi ngegalelo lakhe kwezepolitiki, enkululekweni yezwe nasenhlalweni enhle yomphakathi.

Leli qembu lithi kwavunyelwana engqungqutheleni yokukhetha ubuholi ngo-2019 ukuthi unyaka u-2020 ngowokuhlonipha uShenge ongumsunguli nomengameli wokuhlonishwa weNkatha.

Ukubheduka kweCovid-19 kwanyomfa izinhlelo zeNkatha kwaphoqeleka ukuthi imigubho ihlehliselwe u-2021.

Lokhu kuhlaluke esithangamini nabezindaba se-IFP eThekwini izolo, obekukhuluma kusona uMnuz Narend Singh ongusihlalo wekomiti lezokhetho nokhulumela iqembu, uMnuz Mkhuleko Hlengwa..

Kuthe uma ebuzwa uSingh noHlengwa ukuthi kungani kusetshenziswa ubuso bukaShenge ezintweni ze-IFP kulolu khetho ekubeni ekhona uMengameli we-IFP, uMnuz Velenkosini Hlabisa, bathi yingoba lo nyaka ngowokuhlonipha uButhelezi.

Bathe uButhelezi uzobe ekanye nabo emikhankasweni yokhetho yeqembu ethe chithi saka.

“Akukho ukungezwani ngaphakathi eqenjini. Okwenzekayo yinto okwakuvunyelwene ngayo engqungqutheleni ngo-2019.

Kuyisibusiso kithina ukuba nomholi onjengoMntwana uButhelezi, esincela embeleni wakhe ogwansile. Usebenza ngokubambisana nomengameli we-IFP (uHlabisa),” kusho uHlengwa.

Uthe baya kulolu khetho bebumbene ngenhloso yokushintsha impilo yabantu baseNingizimu Afrika.Ukhuthaze abantu ukuthi baphume bayovotela uguquko futhi bayethembe i-IFP.

I-IFP izosebenzisa imali ephakathi kukaR30m noR35 million ezinhlelweni zayo zokhetho ethi isilulungele.

Izokwethula umqulu wezethembiso zokhetho ongamaphuzu alishumi ngoLwesine ngoSepthemba 30 eGreyville Convenion Centre, eThekwini.

Leli qembu lizofolosa ngabantu abangu-2 570 kuma-ward angu-1 376 komasipala abangu-105 ezweni lonke.

Izongenela ukhetho kuwona wonke ama-ward angaphansi kukaMasipala weTheku nakuMasipala waseGoli.

lNkatha ithi kayihambisani nesinqumo seNkantolo yoMthethosisekelo sokwelula isikhathi sokulethwa kwamagama abazongenela ukhetho okuvalwe ngoLwesibili ng-5 ntambama.

I-IFP ithi kuyinto eyaziwayo ukuthi ibifuna luhlehliselwe unyaka ozayo ukhetho ukuze abantu baphephe kwiCovid-19 kodwa inxuse abavoti ukuthi balandele imigomo enqanda ukusabalala kwaleli gciwane njalo.