I-Sadtu nombhikisho wokudilizwa kwabasebenzi
INYUNYANA yothisha, iSadtu, izobhikishela inkohlakalo, ukunqaba kwemisebenzi, ukudilizwa kwabasebenzi, ukulwa nezehlakalo zokuhlukunyezwa kwabesifazane nezingane kanjalo nezinye izinto ngenyanga ezayo.
Le nyunyana ithe izoba yingxenye yomkhankaso weCosatu, wokulwa nazo zonke lezi zinto njengoba kuzoba nosuku lombhikisho.
UNobhala jikelele weSadtu, uMnuz
Mugwena Maluleke, uthe umhlangano wesigungu sale nyunyana muva nje unqume ukuthi bazokweseka iCosatu kwiNational Day of
Action.
Uthe lo mkhankaso uzobe uholwa yilo mfelandawonye ngoOkthoba 7.
Uqhube wathi iCosatu yaya kwiNedlac, yayazisa ngezinhloso zalo mbhikisho.
“Le mibhikisho izobe yenzeka ezweni lonke ngalolu suku. Amalungu azozikhethela ukuthi azobhikisha kanjani.
Izinto eziseqhulwini esikhala ngazo ukulahleka kwemisebenzi, inkohlakalo, ukushoda kwemisebenzi, udlame olubhekiswe kwabesifazane nezingane, nezinye izinto ezihlupha abasebenzi nabantu bakuleli okubalwa neyokugomela iCovid-19.”
UMaluleke uthe bakhathazekile futhi ngemibiko yokuthi kungase kudilizwe othisha KwaZulu-Natal ngenxa yokunqanyulwa kwesabelomali.
Ukunqanyulwa kwesabelomali kulindeleke ukuthi kuqhubeke iminyaka emithathu kulesi sifundazwe.
Uthe njengoba ngoNovemba 1 kuzobe kuvotelwa ohulumeni basekhaya, iSadtu izokweseka i-ANC.
“Njengoba siyingxenye yeCosatu, sizokweseka i-ANC okhethweni ukugxilisa intando yabantu. Sizovikela neNational Democratic Revolution ngoba abasebenzi banelungelo lokuvotela inhlangano eyabatakula. Ngaphansi kwe-ANC sibonile ushintsho empilweni yabantu bakuleli.”
Uthe abantu banogesi, amanzi, imigwaqo, bathola usizo lwezempilo, isibonelelo sabangasebenzi nezinye izinto eziningi.
“Ngeke sikuphike ukuthi ukhona umehluko owenzekile, nakuba zikhona ezinye izingqinamba ezifana neCovid-19 nezinye.”