I-ATM igadla ngenyanga yemali okhethweni
LIZOGADLA ngenyanga yodumo lokutsaka ngemali emzimbeni kwesobukhansela, iqembu i-African Transformation Movement (ATM). Leli qembu liyaqala ukungenela ukhetho lohulumeni basemakhaya njengoba lisungulwe ngo-2018.
UMnuz Andile “Mzimb’okhalimali”
Dlamini waKwaNongoma, uzobonakala ezikhangisweni ze-ATM, eyimele ku-ward-28 ngaphansi kukaMasipala weTheku, njengoba kusondela izinsuku zokhetho olungoNovemba 1. Ekhuluma neSolezwe izolo, uDlamini uthe ubengakaze azibandakanye namaqembu ezepolitiki kodwa wamukele isicelo sabantu abebemqokile ukuthi abamele okhethweni njengekhansela. Uthe ukhethe i-ATM ngoba ikhombisa ukuhambisana nezinto zenkolo nezamasiko futhi ayibabukeli phansi abelaphi bendabuko.
“Okungenze ngakhetha i-ATM yingoba kungiphathe kabi ukubona uhulumeni ophethe, evalela ngaphandle abelaphi bendabuko ngesikhathi kufika iCovid-19 kuleli. Akangafuna ukuthi babe yingxenye yokuthola isixazululo sokulwa nokubhebheka kwegciwane. Kunalokho uhulumeni unqume ukusebenzisana nabantu baphesheya wangasinaka thina singabelaphi bendabuko,” kusho uDlamini.
Uthe isifiso sakhe esikhulu ukubona abantu besebenza kuphinde kuqhakanjiswe amakhono okuyinto athe unethemba lokuthi ingalekelela ukulwa nobubha.
Uveze nokuthi yize umsebenzi wakhe kuwukwelapha abantu kodwa uma engaba yikhansela ngeke lokho kuphazimeseke ngoba usebenza ngempelasonto ukulapha abantu.
Uthe unethemba lokuthi abantu bazovotela i-ATM ngenxa yezinhloso zayo ezicacile uma kukhulunywa ngokuletha intuthuko kubantu.
Okhulumela i-ATM, kuzwelonke uMnuz Sibusiso Mncwabe, ukuqinisekisile ukuthi uDlamini uzomela iqembu okhethweni oluzayo, wathi iqembu lizokwethula umhlahlandlela wokhetho, maduze.