Kufuneka imibono ngomklamo wamaholo
BANIKWE kuze kube ngu-Okthoba 1, 2021 ukuthi balethe iziphakamiso abafuna kubuyekezwe udaba lwemiholo egculisayo kuleli, iNational Minimum Wage (NMW) ngonyaka ozayo.
Lokhu kudalulwe nguMnyango kaNgqongqoshe wezokuQasha naBasebenzi, uMnuz Thulas Nxesi, othe iziphakamiso zizocutshungulwa yikhomishini ebhekele iNMW, ngaphambi kokuba ishicilelwe.
Umthetho weNMW wango-2018, uyalela ikhomishini ebhekele imiholo ukuthi iyibuyekeze bese yenza izincomo kuNxesi, okubalwa nalezo zomphakathi. NgoFebhuwari, uNxesi wamemezela ukuthi iNMW izonyuka ngehora kube nguR21.69 isuka kuR20.76 ngalo nyaka kusuka ngoMashi 1.
Isitatimende esikhishwe wumnyango sithe:
“Akuvumelekile ukuthi umqashi abuyekeze amahora asetshenzwa ngumsebenzi ukuze angakhokhi iNMW. I-NMW yimali ekhokhwa ngehora ngomsebenzi owenziwe kanti ayifaki imali yokugibela, eyamathuluzi, ukudla nendawo yokuhlala.”
Isitatimende sithe ukuze kubuyekezwe le mali kubhekwa izinto ezinjengokwenyuka nokwehla kwamandla emali, ukubiza kwezinto, izivumelwano zamaholo nezinye izinto.
Ngesikhathi uNxesi ememezela ukunyuswa kweNMW, wathi abasebenzi basezindlini kumele bahole uR19.09 ngehora.
Abasebenza imisebenzi yomphakathi i-expanded public works programme, bona bahole uR11.93 ngehora.
Kwathi imali yabahlanza izakhiwo, kwakumele ikhushulwe ngo-4.5%.
Abafuna ukufaka izincomo bangathumela kwi: Employment Standards, Department of Employment and Labour, Private Bag X117, Pretoria, 0001 noma bathumele ku: nmwreview@labour. gov.za ungakashayi u-Okthoba 1, 2021.