Uzogubha nomphakathi oweMsinga Driftkhana
UZOGUBHA usuku lwakhe lokuzalwa neminyaka engu10 kwasungulwa iMsinga Driftkhana ngokubuyisela emphakathini umsunguli wayo, uSmanga Mabaso, kusuka namhlanje.
USmanga, ozobe ehlanganisa iminyaka engu50 edla anhlamvana kusasa, uhlela umcimbi waminyaka yonke okudlalwa kuwo izimoto, kushaywe izidudla eMphelankani, eMsinga.
Namhlanje uthe uzonikela ngama-laptop angu-20 esikoleni sendawo.
"NgoLwesihlanu kuzodlalwa izimoto njengenjwayelo kwiMsinga Driftkhana. Sibonga uhulumeni ngokuthi athi ukusixegisela kancane nokusho ukuthi sizoba nezethameli ezingu-500. Lokho kuba mnandi nakubashayeli ngoba kuba nzima ukudlala kungenamuntu," kusho uSmanga.
Uthe ngoMgqibelo uyobe eseyonikelela imindeni engu100 yendawo ngezijumbana zokudla.
"Ngithe angifeze okusenhliziyweni ngokuthi ngijabule nabantu bendawo. Siyothi uma siqeda ukuhambisa ukudla bese senza i-picnic ngoba ngihlabe izinkomo ezintathu ukuze kubuswe," kuchaza yena.
Uthe ngoLwesihlanu emuva kokudlalwa kwezimoto, kuzoba nabaculi noDJ abazonandisa.
Phakathi kwabashayeli abazobe bekhona kubalwa kubo iTeam 4 Pipe, Skhotheni, Buzuzu & Son, Eddie Boy no-Austin.
"Amathikithi aphelile eComputicket, abantu sebengaya nje beyozama inhlanhla. Ngale kwalokho bangakwazi ukuthi umcimbi bawubuke usakazwa bukhoma ezinkundleni zokuxhumana.