Unogada ubhale incwadi ukulondoloza amasiko
UGQOZI ekugqugquzeleni nasekufundiseni ngamasiko esiZulu, kumenze wanquma ukubhala incwadi ngenhloso yokulondoloza ulwazi analo, unogada esikoleni samabanga aphakeme iDondotha.
UMnuz Mthandeni Sangweni (58), odume ngokuba yinduna yezinsizwa esigodini saseNxebeni, eDondotha, eMpangeni, uthe inhloso ngokubhala incwadi esihloko sithi Udwendwe, ukuqinisekisa ukuthi amasiko ayalondolozeka ukuze isizukulwane esilandelayo singagudluki kuwo ngenxa yokuswela ulwazi.
“NeBhayibheli liyasho ukuthi isizwe nesizwe esilahla amasiko aso, naso siyolahlwa. Umyalezo wami kubantu ukuthi baqinisekise ukuthi abantu abaguqukeli kokwasentshonalanga bakhohlwe amasiko, okungenani ngenxa yempucuzeko, sebengamane bakushebe kodwa bengawalahliswa yimfundo nempucuzeko,” kusho uSangweni.
Kule ncwadi enamakhasi angu-70, uSangweni uveza ukukhuliswa kwengane yentombazane neyomfana, isiko elenziwayo ngesikhathi zizalwa kuze kube kungenwa esigabeni sokuthomba, ukubuthwa kwensizwa nokumuliswa kwentombi nemicimbi eyenziwa imindeni emibili ekuganiselaneni.
Uthe ubengakaze acabange ngokubhala incwadi kodwa ugqugquzelwe wumzukulu wakhe emva kokuthi ubehleze evakashelwa ngamalungu omphakathi ukuzokwethekela ulwazi ngamasiko.
USangweni usesebenze njengonogada wesikole iminyaka engu-12 emva kokuthi aphelelwa wumsebenzi eGoli ngo-2002, lapho ayesebenza khona.
“Emhlabeni sekuyafiwa ngakho thina esibadala kumele senze konke okusemandleni ukuqinisekisa ukuthi kukhona okubhalwe phansi okuzofundisa izingane ngoba ulwazi olubhalwe phansi kaluboli. Izingane zethu kumele ziyazi imvelaphi nesiko lethu njengesizwe,” kugcizelela yena.
Incwadi ishicilelwe nyakenye ngabakwaInternationally Elegant Publishers, kanti uSangweni uthe angu- 45 kuphela amakhophi abasawenzile njengoba esebenza njengonogada engenayo imali eyanele, wathi kodwa unethemba lokuthi izotholakala ezitolo esikhathini esizayo.
Uthe useke wanikezwa uhlelo esiteshini somphakathi iNorth Coast Radio lapho ebekhuluma khona isikhathi esiyihora ngezinto ezithinta amasiko phakathi kukaJulayi nyakenye noFebhuwari nonyaka.
Uphinde afundise abantu ekhasini lakhe kwiFacebook elithi Mthandeni Sangweni Isazi samasiko.