Kuhlomule imbokodo ngezinsiza zamabhizinisi
KUPHENDULEKE isifiso sabo seminyaka abesifazane benikelelwa ngemishini emikhulu yokuthunga eMtubatuba. UMasipala waseMtubatuba ubanikelele ngemishini emibili emikhulu esetshenziswa yizimboni ezinkulu ezithungela izitolo.
UNkk Jabu Bukhosini waseShisela onguSihlalo weSiyazama Fashion Design okuyinhlangano yomama abayisikhombisa abathungela izikole imifaniswano utshele leli phephandaba ukuthi uyamangala uma ebheka emuva ngoba sekuneminyaka bedonsa kanzima besebenzisa imishini emincane bengenawo amandla okuthenga emikhulu.
"Ngaqala nalabo mama ngibafundisa ngomshini wami omncane owawuhlupha ubuye ufe ngiwukhande. Sithe uma siqala sithola amatoho okuthungela izikole sapatanisa eminye emisha. Ibisisebenzisa kanzima ngoba iyahlupha ngokufa njalo futhi ayikulungele nokwenza eminye imisebenzi nobekusenza singayi phambili. Umasipala usenzele umsebenzi waba lula ngikhale kanye imeya yasisukumela," kusho uNkk Bukhosini.
Ngaphandle kwabo kukhona nabesifazane abawu-52 beMasisukume Women's Club abanikelelwe ngetende nezihlalo. Umholi wale nhlangano uNkk Dududzile Nsele uthe eminyakeni ewu-20 bayaqala ngqa ukuxhaswa.
"Siyangcwabisana singomama futhi silekelele lapho kunezinkinga khona. Uma kuphela inyanga silondoloza imali eThala yokubhekana nezindleko. Itende libaluleke kakhulu uma kushoniwe, lizosisiza ngoba besihlala siliqasha," kusho uNkk Nsele.
IMeya uMnuz Thobelani Ncamphalala ithe inhloso enkulu yokuxhasa izinhlangano zasemakhaya ukuthi zidale amathuba omsebenzi.
"Phambilini abantu bebeluthola uxhaso kodwa uma ubheka bekuphelela emoyeni ngoba bekungezona izinto zokubathuthukisa. Sifuna bakwazi ukuzithuthukisa ngemisebenzi abayenzayo baphinde baqashe abanye abantu endaweni nokuzolekelela ukwehlisa ububha nokuntuleka kwamathuba omsebenzi," kusho uNcamphalala.
Uthe bazosebenzisana nezinhlangano zemifelandawonye ezisemphakathini ikakhulu laba abathungayo ukuze yonke imifaniswano yezikole umasipala anikela ngayo ayithenge kubo.
UNcamphalala uthe abagcinile ngalaba besifazane kodwa bakhona nabangene emkhakheni wezokwakha, ezolimo neminye ababanikelela ngezinsiza.