Owayenguthisha usenenhlangano ewusizo emphakathini
OWESIFAZANE waseMlaza owayenguthishanhloko esikoleni iNseleni Primary, uthi wayengazi ukuthi uyogcina esenenhlangano engenzi nzuzo futhi ize ibe nesikhungo.
UNkk Sibongile Msomi ongumnikazi weSiyanakekela Care okuyinhlangano engenzi nzuzo eseMlaza kwa-E, uthe ngaphambi kokuthatha umhlalaphansi ubejwayele ukuvuka ekuseni ngovivi aphekele abantu abahlwempu.
“Bengiphekela abantu basemphakathini abadinga ukudla, abanye bedinga ukuthi badle ngaphambi kokuphuza amaphilisi. Lokhu bengikwenza noNkk Rosta Mchunu benoNkk Abigail Mbonambi abebevolontiya,” kuchaza uNkk Msomi.
Uthe labo mama ayesebenzisana nabo babefika bathathe ukudla bakuyise ehholo, i-Assembly, lapho akade befike baphakele khona abantu, yena abese eya emsebenzini.
Uthe wayengazi ukuthi kumele ahambe ayobhalisa ukuze ezothola uxhaso ngoba wayezitshela ukuthi uzisizela umphakathi nje.
“Abantu babeloku bethi ngoba umsebenzi ngiyawenza kumele ngivule inhlangano engenzi nzuzo. Ngigcine sengikwenzile lokho. Ngenkathi ngithatha umhlalaphansi emsebenzini wami wokuba uthishanhloko ngo-2014, ngibe sengiqhubeka ngibhekana nalo msebenzi,” kusho uNkk Msomi.
Uthe inhlangano yakhe inakekela intsha yakule ndawo, abantu abanezifo ezingamahlalakhona.
“Sinaye usonhlalakahle osilekelelayo, siphinde sibe nezinhlelo zokufundisa intsha. Izingane lezi zabafana ngiyaziqoqa ukuthi zize zizofunda eSiyanakekela njengoba kade befundiswa ukubaza ngamapulangwe,” usho kanje.
Uthe akakwazi ukuthi uma ephekela umndeni wakhe abale ukudla ngoba uyazi ukuthi unezingane zakhe ezisemphakathini ezimvakashelayo.
“Uma ngenza ukudla kwabantu abane kumele ngazi ukuthi kuzokwanela abantu abangu-10 ngoba kusuke kukhona umuntu ozofika athi ucela ukudla. Ngiye ngizibheke ezinye izingane ezincane emphakathini ezidinga ukuxhumana nosonhlalakahle ngizixhumanise naye,” kulandisa uNkk Msomi.
Eqhuba uthe: “Ngiyafisa ukuthi izinhlangano ezingenzi nzuzo zicobelelane ngolwazi ngoba sonke senza izinto ezehlukene.”
Uthe uyafisa ukuthi umphakathi waseMlaza ubambane futhi abantu banakekelane.
“Ngifisa ukuthi abantu abasha bafunde ngoba imfundo ibalulekile, bese kuthi abantu abadala babe yisibonelo esihle ezinganeni,” kusho yena.
UNkk Msomi usanda kwamukela umnikelo waR10
000 ovelwa kwaTastic ngesonto eledlule, nathe kumjabulisile kakhulu ngoba uzolekelela ekutheni kusizwe umphakathi.