Qaphela ingozi yokuphawula budedengu ezinkundleni zokuxhumana
SEKUKANINGI selulekwa ngobungozi bokuba budedengu ezinkundleni zokuxhumana, abanye okugcina kubafaka enkingeni. Kunabantu abaxoshwa nasemisebenzini ngokuphawula budedengu ezinkundleni iFacebook neTwitter.
Ongoti kwezomthetho wokusebenza kwezinkundla zokuxhumana bathi akukhona ukuphawula okuthize ngenkampani noma ngomqashi wakho okungakufaka enkingeni kepha ngokuphawula noma yingayiphi indlela ewubudedengu kungakubeka engozini yokuthi ukhonjwe ofike ngayo emsebenzini.
Labo ngoti baze bakugcizelele nokuthi ukubhala ngesikhathi okungesona esomsebenzi akukuvikeli, nakho kungakufaka enkingeni uma inkampani noma umphathi eveza ukuthi kudicilela phansi isithunzi senkampani.
Kungakho usikhathaza umkhuba osuthanda ukwanda enkundleni iFacebook emakhasini athize lapho amalungu amakhasi ehlohlana ’ngokuyohlasela’ umuntu othize ekhasini lakhe.
Size saba nombiko ngoLwesithathu ngowesifazane othi useze wavula icala ngenxa yokusatshiswa ngokuthengelwa izinkabi ngamalungu ekhasi elithize kwiFacebook ngoba ecabanga ukuthi nguyena owesifazane obe sematheni ohlelweni lwethelevishini uMnakwethu.
Lo wesifazane njengoba esevule icala, uma bengatholwa benecala abaphawule budedengu ngale ndlela, bangabhekana namacala abucayi. Uma beqashiwe bangaba senkingeni nasemisebenzini abakuyo ngoba ingabaphelela noma baqondiswe ubugwegwe.
Esikunxusayo bafundi wukuthi sikhumbule ukuthi esikubhala kulezi zinkundla kungakha kuphinde kubhidlize ngakho kumele siqikelele ukuthi siphawula ngendlela engenamphumela omubi komunye nakuwe.
Izinkundla zokuxhumana ngezinye zezinto eziqinisa ilungelo loMthethosisekelo lokuphawula ngokukhululeka ngombono wakho kepha lokhu makwenziwe ngendlela enobuqotho nenhlonipho hhayi ubudedengu nobudlabha.