Imidlwembe ye-ANC ishobingela amalungelo akuMthethosisekelo
Ngisika elijikayo ngengikubona sekuyinsakavukela, umchilo wesidwaba, okungukuvinjwa kwe-EFF uma ikhankasa.
Sekuvamisile ukuthi uma umholi we-EFF, uMnuz Julius Malema, ezofika eMgungundlovu, iqembu elibusayo liphazamise. UKhongolose sazi ukuthi waklama indima ekukhululekeni komuntu onsundu nasekulweleni amalungelo abantu okubalwa nenkululeko yezokubuthana njengeqembu lezepolitiki. Kuyichilo ukuthi entandweni yabantu abaningi abayifelayo, iqembu eselazuza inkululeko kube yilona eselinyomfa amalungelo elaliwalwela.
I-ANC ayiqali ukuvimba i-EFF ukuthi yenze imikhankaso yayo ngokukhululeka. Ngo-2015, eCopesville, i-EFF yayihlele umhlangano lapho kuzofika uMalema. I-ANC iholwa phambili ngowayeyiphini lemeya laseMsunduzi ngaleso sikhathi, uMnuz Thobani Zuma, yenza edume ngakho, lapho okwadingeka ukuthi kungenelele amaphoyisa.
Akugcinanga lapho, kwathi ngo2016 uMalema ezofika e-Edendale, kuWard 22, ezohlangana nababengenele ukhetho, yaphinde yashisa amathayi i-ANC, izama ukumvimba. Nakhona ayiphumelelanga. Kwaze kwangenelela amaphoyisa, wagcina efikile umholi we-EFF. Lezi zenzo zakamuva ezenzeke KwaDambuza naseWillowfontein, ziyenyanyisa. Kuyizenzo ezikhombisayo ukuthi bezivele zihleliwe ngoba vele kabaqali ukukwenza lokhu.
Kuyadumaza-ke ngoba kulezi ndawo engizibalulile, kunabaholi abaqavile bayo inhlangano ye-ANC, okuwuDkt Blade Nzimande noDkt Zweli Mkhize, nokuyibona obekufanele bawukhuze lo mhlola. Kuze kube yimanje, abazwakali nje bephumela obala, begxeka lesi senzo sobudlwembe. Lokhu osekushiya imibuzo eminingi ngobuholi babo.
Indawo yaseMgungundlovu yaziwa ngokuhamba phambili ngodlame. Kuyathusa-ke ukuthi ngalesi sikhathi sibe nabantu abazibiza ngenhlangano ebusayo, kube yibona abahamba phambili ukwenza isimo esingesihle. Lesi senzo ngisibona kungesokusabisa abavoti ukuthi bangakhululeki, ukuphuma bayovotela inhlangano abayithandayo. Lokhu kufaka ukwesaba kubavoti. Baphucwa ilungelo labo elishicilelwe kuMthethosisekelo wezwe. Ngithi ayisukunyelwe le nto nabenzi bobubi kumele bajeze. Asikwazi ukuthi singathi sigubha iminyaka engu-27 sathola inkululeko, sizithole singaphazi kwesimo esigqugquzela udlame ngale ndlela.
Sengiphetha nje, ngithi inhlangano eyengamele ukhetho, ayingenelele kulolu daba. Ayikwazi ukuthi ivumele lesi senzo sobudlwembe ngesikhathi sokhetho. Akuvumelekile lokhu okwenzakalayo. Ayikho indawo okufanele ibe ngu-alubhadwa. Sesadlula kuleso sikhathi. Manje umuntu uzikhethela yena inhlangano ayithandayo nafuna ukuyivotela. I-ANC mayiyeke ukulwa ne-EFF.
Ulwazi lungamandla, abe-ANC mabafunde ukwamukela ukuthi amandla ayasuka kubona manje, abantu bakhathele yibona, abayeke-ke ukusabisa abantu ngokwenza udlame.
Khumbulani Nene
Ikhansela le-EFF