Inqobe sekuvalwe amehlo iMaritzburg
KUYILUNGELE seliyoshona iMaritzburg United, ngenkathi iqoqa amaphuzu amathathu kwiMarumo Gallants ngoLwesithathu ebusuku, emdlalweni weDStv Premiership eHarry Gwala Stadium
Igoli leMaritzburg lishaywe nguAmadou Soukouna esiwombeni sesibili. IMaritzburg ingene enkundleni idinga ukuthi iqhubeke nomgqigqo wayo emva kokuwina umdlalo wokuqala wesizini ngempelasonto edlule, lapho yehlule iBaroka koweligi.
Ngaphambi kwalokho ibithole isibhaxu emidlalweni emibili yokuqala yesizini. Emuva kokwehluleka ukwakha amathuba acacile emdlalweni nokusindiswa ngunozinti, iTeam of
Choice igcine iwathole wonke amaphuzu.
Ukwehlulwa kweGallants kusho ukuthi isazohlala emsileni ngoba ayikaze iwine nowokubika umdlalo, kule sizini. Enkundleni, iGallants isheshe yazinza kwaba sengathi iyona edlalela ekhaya, igcina ibhola ithungatha nezintuba zokungena. Nokho abafana beTeam of Choice baphumelele ukuvala wonke amazibuko. Imizamo yeMaritzburg ibingayithwesi ubunzima iGallants, kwazise akukho okutheni obekufika kunozinti uWashington Arubi.
Ithuba elicacile lokushaya igoli leGallants liwele uCelimpilo Ngema ngomzuzu ka-36 kodwa walivimba ngonyawo unozinti weMaritzburg, uMarcel Engelhardt.
Esiwombeni sesibili, iGallants iqhubekile nokugcina ibhola, ifuna izikhala odongeni lwasemuva lweMaritzburg kodwa yehluleka ukuligqobhoza. Ngomzuzu ka-58, u-Engelhardt uphinde wayitakula iTeam of Choice evimba ngezinyawo ibhola likaKatlego Otladisa esebhekene naye. Nakuba iTeam of
Choice yenze izinguquko kodwa akukho okungako okushintshile ngokwezinga lokudlala enkundleni.
Iphunyuke emlonyeni wengwenya ngomzuzu ka-78 ngesikhathi uSede Dion ephuca u-Alfred Ndengane ibhola kodwa walishaya laphuma eceleni kwepali. Ngesikhathi esengeziwe, uSoukouna, uphenduke ngaphandle kwebhokisi, washaya ingcwenga yebhola labhajwa ezintanjeni.