Kugqame iQ Twins kwabaqokwe kumaSatma
KUGQAME iqembu lomculo elibunjwe ngamawele akwaQwabe, iQ Twins, kumaSouth African Traditional Music Award (Satma) ngesikhathi kumenyezelwa abaqokiwe ePremier Hotel, esifundazweni, iMpumalanga, ngoMgqibelo.
IQ Twins iqokwe kwiBest Female Artist/Group, Best Traditional House Music Song nakwiBest Traditional Collaboration Song. Kule minxa eliqokwe kuyona libambene noCandy owazakhela udumo engomeni ka-Oskido, iTsa Mandebele. UCandy uphinde waqokwa emkhakheni weBest Traditional Music Artist /Group of the year.
Isikhulu esiphezulu samaSatma, uZandile Nzimande, sithe kulo nyaka bahlanganise ukumenyezelwa kwabaqokiwe nokwethula ngokusemthethweni lo mcimbi ozoba ngoNovemba 27 khona eMpumalanga.
“Kulo nyaka sineminxa engu-27 evotelwayo. Sinxusa abantu ukuthi baqale bavotele amaciko abawathandayo ngokuthumela umqhafazo ku-49495. Umqhafazo ubiza uR1.50. Ngicela uma abantu bevota, babhale ukuthi: SATMA bese befaka ikhodi yeciko abalivotelayo njengoba bonke abaqokiwe benamakhodi abo.
“Uma bebhala umyalezo, ngicela bangasishiyi isikhala phakathi kwegama elithi: Satma nekhodi futhi bangalifaki ikhoma ngoba lelo voti lizobe selonakele. Ngokunjalo namagama abaculi bangawafaki kodwa basebenzise amakhodi kuphela,” kubeka uZandile.
Njengoba amaSatma enenkotileka yeminyaka emithathu esesifundazweni, iMpumalanga, ezophela ngonyaka ozayo, uNgqongqoshe wezobuCiko namaSiko eLimpopo, uThandi Moraka, uthe nabo bafuna ukuthi bawathathe eze kubona eminyakeni ezayo.
Umsunguli wamaSatma, uDumisani Goba, ubengekho njengoba ayememezele nyakenye ukuthi akasezoba wumgqugquzeli wawo, wanika izintambo uZandile.
Ngesikhathi kwethulwa imiklomelo, uBig Zulu uhlanyise izihlwele eqhulula izingoma zakhe ezikwi-albhamu entsha: Ichwane Lenyoka ehambisana noLwah Ndlunkulu. Amanye amaciko ajabulise abantu ngosomahlaya uMduduzi Ntuli noSummary kanti uhlelo beluphethwe wuTsholo Maseko.
Iminxa yabaqokiwe namakhodi abo aphelele kukhona ekhasini lamaSatma kuFacebook.