UMngqithi uvuma isikweletu seSundowns kwiMTN8
UMQEQESHI weMamelodi Sundowns, uManqoba Mngqithi, uvumile ukuthi ukwehluleka kwabo ukunqoba isicoco seMTN8 kuze kube yimanje, kungenye yezinto ezibakhuthazayo ngaphambi komdlalo wabo ne-Lamontville Golden Arrows.
La maqembu azogadulisana emlenzeni wesibili e-Lucas Moripe Stadium kusasa ngo-6 ntambama emuva kokubambana ngo-1-1 kowokuqala owawuseSugar Ray Xulu Stadium.
NgoMgqibelo, amaSandawana aqumbe phansi i-Orlando Pirates ngo-2-0 koweDStv Premiership.
Esithangamini nabezindaba izolo, uMngqithi uthe iyabajabulisa indlela abayiqale ngayo isizini kodwa kusemqoka ukuthi balwele ukuqhubekela phambili kwi-MTN8 bazame ukuqeda ishobolo lokungayithathi le ndebe. ISundowns ayikahlulwa selokhu kuqale isizini, kubalwa nemidlalo yeligi.
"Sesibhekane nezinkinga eziningi kwi-MTN8 ngaphambilini. Ngikhumbula ukuthi sake sakhishwa yiPlatinum Stars ngoba mhlawumbe sasheshe sasebenzisa abadlali abasha bengakangeni kahle eqenjini," kusho uMngqithi.
"Sake sahlulwa yiWits kowamanqamu. Ngaleso sikhathi, besidlala nakwiCaf Champions League futhi sesingene kowandulela owamanqamu. Abadlali babekhathele ngenxa yokuhamba amabanga amade.
"Sikhishwe kowandulela owamanqamu yiCape Town City ngomunye unyaka. Ngicabanga ukuthi senza kahle kakhulu kodwa saba neshwa. Ezinye izinqumo azizange zisivune eKapa.
"Ngeke ngithi sihlale siyiqala kabi isizini, kodwa-ke ngingasho ukuthi kwiMTN8 sibhekane nezimo ezahlukahlukene ezenze ukuthi singayiphakamisi indebe. Namanje kusamele siqaphele ngoba njengoba ngisho ngithi sesike safika kowamanqamu sibhekene neWits nakowandulela owamanqamu neCape Town City kodwa sahluleka ukuphakamisa le ndebe.
Kumele sinyathele ngokucophelela futhi siqinisekise ukuthi siwulungiselela kahle umdlalo," kusho uMngqithi.
UMngqithi, owayiphakamisa le ndebe ngo-2009 esaqeqesha Abafana Bes'thende, uqhube wathi: “Sidlala neqembu elihleleke kakhulu, kumele ngibe neqiniso. Iqembu elishaya amagoli futhi bobabili abagadli balo basefomini. UMutizwa (Knox) ubuyile, uGumede (Michael) usaqhubeka nokushaya amagoli.
"USibiya (Nduduzo) useqala ukukhombisa umlingo wakhe. Ungumdlali engikholwa wukuthi angayenzela okuningi i-Arrows kodwa mhlawumbe kwesinye isikhathi akasebenzi ngokuzikhandla. UPule Mmodi naye udlala kahle kakhulu, kanjalo nabagijima enkabeni yesisu oDlamini (Nqubeko), Ndwandwe (Velemseni), noMbhele (Simo).
"Siyazi ukuthi sidlala neqembu elihlelekile kodwa sinesikweletu sokungenisa iSundowns emdlalweni wamanqamu. Kuzofanele senze konke okusemandleni ukuthi singangenisi magoli bese sizama ukushaya noma amabili ukuqinisekisa ukuthi sidlulela phambili."
Komunye owandulela owamanqamu kwi-MTN8, iSwallows izotholana phezulu neCape Town City eDobsonville Stadium, ngoLwesithathu ngo-6 ntambama. Babambana ngo-0-0 emlenzeni wokuqala eKapa.