Kubanjwa zidindi ziphunyuka kwiChiefs kweyeligi
Ngasohlangothini lweGallants, kade izingela iwini yokuqala kwiligi phezu kokuba yenza kahle kwiCaf Confederation Cup.
Emdlalweni iChiefs izinze kuqala, ikhombisa ukufuna ukuwuphatha. Kodwa lokho kusheshe kwaphela iGallants isikhombisa ukuthi ayizimisele ukuyidedela icanase.
Akuthathanga isikhathi eside, iGallants yabuza kunozinti weChiefs uDaniel Akpeyi otakule ezakhe evimba ibhola elingqofwe nguKatlego Otladisa ngomzuzu ka-14.
Emuva kwaleli thuba, iGallants ibuye iphindelela kodwa ihluleka uma isifike phambili.
Esiwombeni sokuqala unozinti weGallants, uWashington Arubi ubefana nesivakashi kwazise akavimbanga lutho oluthunyelwe yiChiefs.
Esiwombeni sesibili, iChiefs ibuyile yazama ukuhlanganisa amaphasi. Igcine imtholele umsebenzi u-Arubi ngomzuzu ka-58 evimba kalula i-free kick kaLebo Manyama ebishaywe ngaphandle kwebhokisi. Ngomzuzu ka-75 uSifiso Hlanti uthole ikhadi elibomvu emuva kokudlalisa kabi u-Otladisa. Kusukela kuleyo free kick eshaywe nguNdabayithethwa Ndlondlo, u-Akpeyi uchithe sekuvalwe amehlo ibhola elingqofwe nguThabo Mnyamana.
Sekusele imizuzu engu-10, iGallants isale nabadlali abangu-10 enkundleni kulandela ukuthola ikhadi elibomvu kukaCelimpilo Ngema oshaye ngebhola uKhama Billiat elele phansi.
Uze wafika ekugcineni ke umdlalo zibambene. Lo mphumela usho ukuthi iChiefs isanqobe kanye emidlalweni emihlanu, okuyenza ibalwe namaqembu angaphandle kweTop 8. IGallants nakuba kukhulunywa ukuthi isukile emsileni yingenxa yeTS Galaxy ethole isibhaxu sika 4-2 komunye umdlalo weligi wangeSonto. IGalaxy nayo ayikanqobi.