AbeTourism KwaZulu-Natal bavivela ukwamukela izivakashi
SEBEKUVIVELE ukwamukela izivakashi eziqhamuka emazweni ahlukene aphesheya kwezilwandle abeTourism KwaZulu-Natal.
Lokhu kuvezwe yisikhulu esiphezulu kwiTourism KwaZuluNatal, uPhindile Makwakwa, ngesikhathi ehlangene nabezindaba eManguzi, eThonga Lodge, ngempelasonto.
UPhindile uthe kube yinto enkulu kubona ukususwa kweNingizimu Afrika ohlwini lwamazwe ahlaselwe kakhulu yiCovid-19 njengoba sekuzotheleka izivakashi eziqhamuka emazweni ahlukene ehlobo.
Uthe i-UK ingelinye lamazwe anezivakashi eziningi ezivakashela kuleli uma kungamaholidi nokube nomthelela omubi kwezokuvakasha ngesikhathi elakuleli lisabekwe ohlwini lwamazwe ayingozi ngenxa yeCovid-19.
“Into sonke esiyishayele ihlombe wukuzwa izindaba zokuthi asisekho ohlwini lwabayingozi.
“Siqala isikhathi sasehlobo manje futhi njengeTourism KwaZuluNatal sikubheke ngabomvu ukuthi samukele izihambeli zethu njengoba zonke izindawo zethu zokuphumula sezimi ngomumo ukwamukela izivakashi ezizokhetha ukuzochitha amaholidi okuphela konyaka nathi,” kusho uPhindile.
Uthe umkhakha abakuwona yize ukhahlamezeke kakhulu ngenxa yeCovid-19 kodwa kubajabulisile ukuthola izindaba zokuthi iKZN iyona ethole izivakashi eziningi ngo-2020.
“Abantu bakuleli ngesikhathi bekhetha lapho bengavakashela khona iKZN iyona abayithanda kakhulu nokuyinto ekhombisayo ukuthi muhle umsebenzi esiwenza nosomabhizinisi esinabo kulo mkhakha futhi nathi siyakwazi ukuveza izinto ezihlukene abantu abangazijabulela kuleli.”
Uthe osomabhizinisi abancane abakwezokuvakasha abaqhubeke nokufaka izicelo zemali yokuxhasa amabhizinisi abo njengoba sekuxegisiwe imigomo yomvalelandlini.
“Imali yokubeseka emabhizinisini abo ikhona, ngakho mabafake izicelo ukuze bayithole,” kuchaza yena.
Uthe maduzane bazokwethula uhlelo noNgqongqoshe uRavi Pillay lapho bezobe sebenxusa khona abantu ukuthi bavakashele iKZN bazijabulise nemindeni yabo.