Imindeni ayifuni banikwe ibheyili abasolwa ngokubulala
IMINDENI yabagilwa ithandazela ukuthi banganikwa ibheyili abasolwa ababili, ababheke necala lokubulala ngesihluku amalungu omndeni owodwa nomngani, KwaNongoma oDushwini, ngeledlule.
UMnuz Lethuxolo Zwane (38) nomshana wakhe uMnuz Mfundo Thalente Zwane (28), kulindeleke ukuthi bavele kusasa eNkantolo yesiFunda yaKwaNongoma bezocela ibheyili.
Abasolwa baboshwe ngoLwesibili emva kosuku kubulawe ngesihluku uSimphiwe Shiba (17), Nksz Sinokwethemba Shiba (22) nengane yakhe uLuvuyo Nkosi (2) nomngani kaSimphiwe, uSandile Mthombo abebefunda uGrade 12 ePhumanyova High, KwaNongoma. Kulesi sigameko kulimale kabi umama wekhaya uNkk Shiba osesibhedlela.
Abasolwa bavele enkantolo ngoLwesihlanu ngamacala okubulala nokucekelwa phansi kwempahla njengoba kuthiwa bangqongqisa umuzi kwasha nabagilwa.
Uninalume kaSandile, uMnuz Nkosinathi Zikalala uthe kusenzima ukusikhohlwa lesi sigameko, njengoba yomibili imindeni elahlekelwe ngamalungu kudingeke ukuthi ngoMgqibelo iye emakhazeni iyokhomba izinsalela zawo.
“Kungiphatha kabi ukuthi abantu ababulale ngesihluku esinje, bayanikezwa ithuba lokucela ibheyili. Engikubonile ngisekude ukukukhohlwa. Ezinye izingxenye zomzimba bekuze kumele sizihlukanise thina zikuplastiki ukhombe lokhu okungathi ngokwelungu lakho. Kubuhlungu okwenziwa yizinkantolo, namanje ngisasho. Zazingabadedela kanjani kwakhona ekuqaleni abantu ababebulale ngesihluku esingaka khona endaweni? Nginomuzwa wokuthi basazophinda badedelwe baqhubeke nezenzo eziwubulwane,” kusho uZikalala.
Laba basolwa baboshwa nje, bebevele bengaphandle ngebheyili ecaleni lokubulawa kwenhloko yekhaya emndenini wakaShiba, uMnuz Bhekuyise ‘Gumbagumba’ Shiba kuthiwa wadutshulwa esemzini wakhe kubuka izingane. Kusolakala ukuthi ukuhlaselwa kwalawa malungu, yisenzo sokugqiba ubufakazi.
Okhulumela umndeni wakwaShiba uMnuz Elliot Shiba, uthe uNkk Shiba bamcelelile esibhedlela ukuthi azofihla izingane zakhe baphinde bambuyisela khona emva komngcwabo.
“Yena uyazama ukumelana nalesi simo. Umasipala ungenelile wasilekelela ukungcwaba amalungu ethu ngesizotha. Kube kuhle ukuthi sisheshe singcwabe esimeni esinjengalesi ngoba ngokwejwayelekile kuvamise ukuthi izinsalela zihlale isikhathi eside kusenziwa ulibofuzo uma abashonile beshisiwe,” kusho uShiba.
Emva kokuboshwa kwabasolwa ngesonto eledlule, amalungu omphakathi anikela emzini wakwaZwane awungqongqisa kwabulawa nemfuyo. Induna yendawo uMnuz Sipho Nkosi ithe bekuheleza umoya wokuthula ngesikhathi kungcwatshwa abashone kulesi sehlakalo.
“Kubuhlungu okwenzekile, kodwa njengabaholi sigqugquzela ukuzwana nokuthula kubantu. Asinanxa nezingane zakwaZwane esezigcwele izinkalo emva kokuthi umphakathi ushisile, ngoba abenzi bokubi sikholwa wukuthi bebengathunyiwe kodwa kungcono kona ukuthi zibhace lapho zibhace khona uma zizizwa zingaphephile,” kusho uNkosi
UNgqongqoshe wezokuThutha ukuPhepha nokuXhumana koMphakathi uNkk Peggy Nkonyeni uhambele imindeni ngoLwesihlanu eyobhonga emswaneni.