Ibuyisa ithemba iBafana kodwa sibambe umoya
IBAFANA Bafana yagcina ukudlala kwiNdebe yoMhlaba ngo-2010 nokwaba yisikhathi esivusa amadlingozi, kuduma amavuvuzela, igoli lokuvula elimangalisayo likaSiphiwe Tshabalala. Siyakhumbula nezihlabani oCristiano Ronaldo noLionel Messi bedlala ezinkundleni zaseNingizimu Afrika, neSpain siba yingqwele yomhlaba ngokushaya iNetherlands ngo-1-0 kowamanqamu.
IBafana yadlala kweyoMhlaba ngenxa yokuthi yayisingethe le midlalo. Yayigcine ukungena kuyona ngezikhwepha zayo emidlalweni eyayisingethwe yiJapan neSouth Korea, ngo-2002.
Lokho kwakuseminyakeni engu-19 eyedlule, yingakho abalandeli bengasabheke lutho olutheni kwiBafana njengoba kuhlungelwa imidlalo yangonyaka ozayo eQatar - sebephoxeke kakhulu. Muva nje kodwa kunenhlansi yethemba ngaphansi komqeqeshi omusha uHugo Broos. IBafana isiqoqe amaphuzu ayisikhombisa emidlalweni yokuhlunga futhi inethuba lokuwandisa emdlalweni ne-Ethiopia eFNB Stadium namuhla.
Kubukeka uBroos eyivuselela kabusha iBafana. Ufaka ugqozi kubadlali futhi ubukeka engancethezi ngezinkinga ahlangabezana nazo. Akakwesabi ukwenza ushintsho njengoba egudluze ukaputeni uThulani Hlatshwayo wafaka uRonwen Williams.
Ulaxaze noThulani Serero ongasabizwa eqenjini lesizwe. Ubukeka ehlomula ngokukhetha abadlali abafana no-Evidence Makgopa, Bongokuhle Hlongwane, Yusuf Maart, Ethan Brooks noJesse Donn.
Yize luselude ukhalo kodwa uBroos unethemba lokuthi ukuhlanganisa abadlali abasebancane nabanamava kuzobeka iBafana eQatar, ngonyaka ozayo.
Kudingeka ukuthi iBafana iqede iqhwakele kuGoup G enamazwe ahlanganisa i-Ethiopia, Ghana neZimbabwe.
Amazwe angu-10 ase-Afrika azoqeda ephezulu emaqoqweni akuwo azokube eseqhathwa emidlalweni yemilenze emibili ukuze kuphume amahlanu azomela i-Afrika kweyoMhlaba.
Imidlalo yokuhlunga izophothulwa ngoMashi wonyaka ozayo. Okwamanje asibambe umoya ukuthi iBafana izoqhubeka nokuzicabela indlela.