Akaqashwa ngoba engenayo imali yokugwaza

MHLELI: Bengicela ukuphawula mayelana nobunzima engibuthole eMnyangweni wamaPhoyisa. Bengicela uNgqongqoshe uBheki Cele aphumele obala ngalolu daba. Ngikhuluma nje nginengane engasebenzi.

Kunosuku lapho ingane yami yashayelwa ucingo yabizwa njengomuntu ozohamba iye ekoilishi lamaphoyisa. Uma ifika eThekwini kwabizwa amagama alabo abagwazile, elakhe langabizwa.

Ingane yami yenza zonke izivivinyo yaziphasa kodwa lutho ukuqashwa ngenxa yezikhohlakali. Into eyenzakalayo wukuthi kubhalwa ngepeni lomsizi emaphepheni ezivivinyo. Ngale ndlela kuba lula ukuthi kususwe igama lalowo ophasile, kubhalwe elalowo onemali yokugwaza.

Olwami udaba selwahamba lwaze lafika eHhovisi likaMengameli uqobo kodwa lutho impendulo. Lutho ukuphendula uKhehla Sitole, lutho ukuphendula uBheki Cele, lutho ukuphendula uMvikeli woMphakathi, lutho ukuphendula iKhomishini yamaLungelo Abantu.

Sengikhulume nabaningi abasebenza ehhovisi lokuqashwa kwabantu kwiSAPS, iningi labo ngo-colonel no-brigadier. Balokhu bengitshela ukuthi basaphenya. Kuyoze kube nini kulokhu kuthiwa “siyaphenya?”

Ngonyaka odlule, ngenkathi ngishaya ucingo, ngaxhumana nowesimame wakwaZondo, wangitshela ukuthi nguye ophethe ifayela lami, wathi ingane isishaywa yiminyaka, kungcono ifake izicelo ngaphansi kohlelo lama-reservist. Kwenzeka kanjani lokho, kuyibona abamoshele ingane yami?

Ingane isike yazama nokuzibulala amahlandla amabili. Uma siyobika emaphoyiseni, ngatshelwa ukuthi mangihambe ngiyovula iProtection Order enkantolo. Ingenaphi-ke iProtection Order, ingane ixakekile ifuna ukuqeda ngempilo yayo?

Angikaze ngiyizwe into enje. Saze sahlala ezweni elinabantu abangenalo uzwelo. Namhlanje kuthiwa asivote, sivotele yona le nkohlakalo egcwele kwiSAPS?

Siphinde sivotele ukucindezelwa njengoba kwenzeka kumanje? Saze savelelwa!

Isakhamuzi EMLAZA