Uzolwela ibhande laseMzansi owaseNtshanga
KUMNIKA umdlandla ukuqhuthana nengqwele eyaziwayo umshayisibhakela waKwaZulu-Natal, uSanele "Tornado" Msimang, ozobhekana nompetha we-SA lightweight uTshifhiwa "Atomic Spider" Munyai waseLimpopo.
UMsimang (14-3-0) waseNtshanga, uzolwela ibhande laseMzansi okokuqala kusukela aqala isibhakela esikhokhelayo ngo-2011.
Uzoxhimfana noMunyai (33-6-1) ezimpini ezihlelwe yiGauteng Boxing Promoters Association ezibizwa nge-Hot Summer Knockouts ezizoba seBooysens Boxing Club ngo-Okthoba 31.
UMunyai, owayengumpetha we-International Boxing Organization (IBO) ne-WBA Pan African, uzobe elivikela okwesibili ibhande le-SA lightweight aliwine nyakenye lingaphethwe muntu ehlula uSiphosethu Mvula wase-Eastern Cape. Ulivikele ngempumelelo kuKhaya Busakwe emshaya ngimcacamezelo womlalisa phansi ngoMeyi.
"Kuyangikhuthaza ukuthi ngizolwa noMunyai owaziwayo, hhayi ibhokisa nje elingazelwa lutho esibhakeleni. Ngifuna ukukubona konke lokhu abahlale bekusho ngaye. Nami ngiveze amandla ami kuyena. Le mpi izonginika ithuba lokuthi nami ngiveze isipiliyoni esenginaso esibhakeleni, ngakhe igama lami liqhubekele phambili. Ngifuna ukwakhela ngaye uMunyai," kusho uMsimang.
UMsimang, osezinze eBhayi lapho eqeqeshwa khona nguCaiphus Ntante, ugcine ukungena eringini ngoMashi ehlula uRipfumelo Chikwambana waseLimpopo. Ukleliswe eqhulwini kwabagaqele ibhande likaMunyai yinhlangano eyengamele isibhakela eMzansi iBoxing South Africa
(BSA). UMsimang uyawazi umuzwa wokuba umpetha kwazise uphathe ibhande leKZN esisindweni se-Junior lightweight.
"Selokhu ngaqala isibhakela bekuyiphupho lami ukuba ngumpetha waseNingizimu Afrika. Kuyiphupho lami okubalwa nabashayisibhakela abaliwinile ibhande laseMzansi. Ngifuna ukuliwina leli bhande, ngiligcine isikhathi eside," kusho uMsimang.