UMokwena ucacisa ngokwenza uSirino eqiwe yijezi
URHULANI Mokwena osethimbeni labaqeqeshi kwiMamelodi Sundowns uchaze kabanzi ngesimo esibhekene noGaston Sirino wase-Uruguay ongalitholi njalo ijezi selokhu kuqale isizini yize engalimele.
Lo mdlali obengaconsi phansi kubalandeli beSundowns phambilini, usadlale imizuzu engu-34 kwiDStv Premiership neminye engu-45 kwiMTN 8 kule sizini ka-2021/2022.
Nokho ngaphambi kokuphela kwesizini edlule bese kukhona abamsola ngokuthi indlela aziphatha ngayo ikhombisa ukuthi umqondo wakhe awusekho eChloorkop.
Emawindini amabili okushintshana ngabadlali adlule, uSirino ubemataniswa nomqeqeshi wakhe omdala uPitso Mosimane okwi-Al Ahly yase-Egypt.
Ngendlela indaba kaSirino yokufuna ukuya kwi-Ahly eke yashuba ngayo, noManqoba Mngqithi ongumlingani kaMokwena kwiSundowns, uke wamkhuza lo mdlali ngokuziphatha kade kuvele izithombe zakhe (uSirino) edlubhe ijezi lamaRed Devils kusaphele isikhathi esincane ekhuzwe ngento efanayo.
Ngaphambi kokuma kwemidlalo yeligi ngenxa yekhefu lemidlalo yeFifa, uMokwena obenesithangami nabezindaba unabe kabanzi ngoSirino nesimo abhekene naso kwiSundowns.
“Kungaba amanga aluhlaza ukuthi asimkhumbule enkundleni uGaston (Sirino) ngamaqhinga akhe akwazi ukusiwinela ngawo umdlalo ngomnyakazo owodwa,” usho kanje uMokwena kwabezindaba.
“Yize kunjalo, kusemqoka ukwazi ukuthi uGaston esimfaka enkundleni, yilo weqophelo esilazi sonke futhi abe osemdlalweni ngokomqondo ngokugcwele. Okwamanje yileyo inkinga esibhekene nayo sonke ngoGaston nokungadlali kwakhe njengenjwayelo. Uma ezimisele ngokubuyela enkundleni kufanele alwe nalaba okuyibona abadlalayo manje. Kunjalo nje kwiSundowns futhi akekho ongazi. Abadlali esibasebenzisayo kulezi zinsuku kusobala ukuthi yibona esibona ukuthi basinika le miphumela esihlale siyifuna njalo,” kusho lo mqeqeshi.
Esesonga uMokwena uthe, abadlali abathola ijezi kulezi zinsuku badlala kahle kakhulu kodwa ngesikhathi esifanayo baneme ngendlela laba abangadlali abazimisele ngayo ejimini ngoba lokhu kwenza iqembu lihlale liwukhonkolo.
ISundowns izihola phambili kwi-log ngamaphuzu awu-16 njengoba ingakashaywa, isadlale kanye ngokulingana emidlalweni eyisithupha.
Uma sekuphele ikhefu izoqala imidlalo yeCaf Champions League lapho izobhekana neManiema Union ekuhambeni ngo-Okthoba 17 emlenzeni wokuqala wokuhlungela amaqoqo.