OweBafana udalula ikhubalo likaBroos
ISITOBHA seBafana Bafana, uRushine De Reuck, sidalula ikhubalo lomqeqeshi omusha uHugo Broos okubukeka ebuyisa izinsuku zenjabulo eqenjini lesizwe lebhola. UBroos uphenduke isitha kwabaningi elahlela kude izethenjwa zeBafana, ebumba iqembu kabusha ngabadlali abasebancane. Emidlalweni emithathu yokuhlungela umqhudelwano weNdebe yoMhlaba ozoba seQatar ngonyaka ozayo, uBroos akayazi induku.
Namuhla ngo-6 ntambama eFNB Stadium, lo mqeqeshi waseBelgium, uzophinde ahole iBafana uma isibhekene ne-Ethiopia emdlalweni wesibili. Ngempelasonto edlule iqembu lakuleli lehlule i-Ethiopia ngo 3-1 ekuhambeni.
UDe Reuck uveze okwenza liphumelele iqembu ngaphansi kukaBroos.
"Usinika inkululeko yokudlala enkundleni. Wonke umuntu ujabule ngaye. Indlela alibophela ngayo iqembu, bonke abadlali bayakuqonda okufanele bakwenze enkundleni. Uma unalokho futhi unomqeqeshi okholelwa kuwena
(kuba lula). Sonke sifuna ukumlwela enkundleni. Sonke sifuna aphumelele njengoba naye efuna siphumelele. Ngakho kulula ukudlalela umqeqeshi onjalo," kusho uDe Reuck.
"Sifuna ukumenzela kahle. Umoya muhle ekhempini. Sonke sifuna ukumdlalela. Uma singaqhubeka nokwenza kahle singabadlali abasebancane eqenjini, lokho kungaba yinto ekhethekile kakhulu. Yisizukulwane esisha lesi. Sifuna ukuzenzela elethu igama. Yilokho esikuzamayo."
IBafana, enamaphuzu ayisikhombisa, ihlezi eqhulwini kuGroup G okukhona kuwona iGhana neZimbabwe. Ngesikhathi iBafana igijimisana ne-Ethiopia namuhla, iGhana izobe idudulana neZimbabwe, eZimbabwe National Sports Stadium, eHarare. UBroos umincele ukuthi iGhana ilahle amaphuzu, iBafana iwine kwi-Ethiopia ukuze izonethezeka esicongweni se-log.
IBafana izobukwa abalandeli abangu-2000 abagomele igciwane iCovid-19. Ngokusho