Kumiswe ukufunda kubulawa umfundi ngokugwazwa esikoleni
KULINDELEKE ukuthi siphume emva komhlangano wabazali isinqumo sokuthi kuzoqhubeka nini ukufunda eQhamuka High School, eMacekana ngaphandle kwaseMpangeni.
Lokhu kulandela ukubulawa ngokugwazwa komfundi obenza uGrade 10 esikoleni sakhona ngoLwesihlanu.
Ngokuthola kweSolezwe isehlo sokubulawa komfundi wuzakwabo senzeke emva kwengxabano ebiqale ngoLwesine ngaphandle kwamasango esikole.
Induna yesigodi Amakhwela, uMnuz Phiwayinkosi Dlamini, ithe isigameko senzeka nje, ibikade ibakhuzile abafundi ababelwa ngoLwesine ukuthi mabayeke abakwenzayo ngoba uma beqhubeka ngeke kuphethe kahle.
“Ngazithela phezu kwabo belwa, abanye beshayana ngamatshe ngoLwesine. Ngama ngabakhuza ukuthi abayiyeke le nto abayenzayo ngoba isiphetho sayo ngeke sibe sihle.
“Bangilalelile, bayeka kodwa ngagcina ngingatholanga ukuthi yini kahle hle imbangela yokulwa kwabo,” kusho uDlamini.
Uthi washayela kusihlalo wesigungu sabazali emazisa ukuthi uqeda ukukhuza umsindo phakathi kwabafundi besikole sakhe. Uthi ube eseqhubeka nohambo lwakhe ecabanga ukuthi noma yini ebibangwa ngabafundi isidlulile kanti akabuzanga elangeni.
“Ngithole ucingo luvela kuye usihlalo ngezithuba zasekuseni ngoLwesihlanu, engazisa ukuthi kubo labo bafundi ebengibakhuza ngayizolo sekukhona osegwazwe washona ngaphakathi emagcekeni esikole,” kusho uDlamini.
Uthe ukhona umhlangano ababe nawo nemindeni yabafundi abathintekayo, okukhona kuyo nowomfundi ogwazwe washona.
Uveze ukuthi akubanga yibo bonke abazali babafundi abathintekayo abaphumelele njengoba abanye beveze ukuthi banovalo lokufika emhlanganweni.
“Yehlile kancane imimoya kulabo abakwazile ukuphumelela. Sinethemba lokuthi kulona wakusasa (namuhla) umhlangano, sizophuma isixazululo,” kusho uDlamini.
Uthe empini yabafundi kuthinteka isigodi sakhe, Amakhwela nesinye athe yiNtaba Inamasi.
Imizamo yokuthola umndeni womfundi oshonile iphunzile.
USihlalo wesigungu esilawula isikole, uMnuz Zakhele Mthembu, uthe akafuni ukuphawula kakhulu ngalolu daba ngoba lungcolisa igama lesikole.
“Engingakusho nje wukuthi lolu daba lusingethwe ngamaphoyisa, umnyango kanjalo nobuholi bomdabu bendawo, okukhona kubo izinduna, nobukhosi besizwe eBathenjini,” kusho uMthembu.
Okhulumela amaphoyisa KwaZuluNatal, uConstable Thenjiswa Ngcobo uthe ngo-Ephreli 29 ngezithuba zawo-8 ekuseni, abafundi baqala impi ngaphakathi esikoleni, kwagwazeka oyedwa.
“Uphuthunyiswe emtholampilo oseduzane lapho efike kwatholwa khona ukuthi useshonile.
Kuvulwe icala lokubulala esiteshini samaphoyisa eMpangeni. Amaphoyisa asaphenya,” kusho uCostable Ngcobo.
Okhulumela uMnyango wezeMfundo KwaZulu-Natal, uMnuz Muzi Mahlambi uthe banalo ulwazi ngesehlo.
“Sikhungathekile njengoba abafundi bebonakala beqhubeka nokufika nezikhali ezikoleni yize bezwa ukuthi lokho kugcina kuholela ezigamekweni ezingezinhle. Njengamanje sesinabafundi abahlukaniswe kabili, okungumufi nesiboshwa,” kusho uMahlambi.