Ingebhe kwenyuka izibalo zeCovid-19 eKZN
SEKUQUBUKE uvalo KwaZulu-Natal, kulandela ukwenyuka kwezibalo zabahaqwe yiCovid-19. Ngokwezibalo zangempelasonto, bangu-1 700 abantu abahaqwe yileli gciwane esifundazweni.
UNgqongqoshe wezeMpilo KwaZuluNatal, uNksz Nomagugu Simelane, uthe u-80% wezibalo zakamuva ukubantu abakuMasipala weTheku, kuthi u-7% ube kwabakuMasipala waseMgungundlovu kanti u-5% ube kubantu abangaphansi kweLembe.
Uthe emva kokubonakala kokwehla kwezibalo emasontweni edlule, kungokokuqala ukuthi kubonakale izibalo zifuna ukufinyelela ku-2000.
Uphinde waveza ukukhathazeka kwakhe ngezibalo ezinyukayo zabantu abalaliswa ezibhedlela ngenxa yobhubhane.
“Ebantwini abangu-437 abalaliswe ezibhedlela zikahulumeni nezizimele ngenxa yeCovid-19, abangu-47 kubo balaliswe emagunjini abantu abagula kakhulu, kuthi abayisishiyagalolunye baphefumula ngokusizwa yimishini,” kusho uNksz Simelane.
Uthe lezi zibalo ezibukeka zikhula ngesivinini, ziyabakhathaza bengumnyango.
“Kusobala ukuthi kukhona umonakalo owenzekayo. Okwamanje asikakabi naso isiqiniseko sokuthi ngabe sekuyihlandla lesihlanu leli noma cha kodwa lezi zibalo ziyasikhathaza kakhulu,” kusho yena.
Uthe yingakho benxusa izakhamuzi ukuba ziqaphele, ziyigcine yonke imigomo yokuzivikela okubalwa kuyo ukugqokwa kwezifonyo, ukugcina ibanga lokuqhelelana, kanjalo nokuwashwa kwezandla ngensipho namanzi kuphindwe kusetshenziswe isibulali-magciwane.
Uqhube wathi, selokhu kwahlasela iCovid-19, iKwaZulu-Natal isilahlekelwe ngabantu abangu-16 079, ngakho bayanxuswa abantu ukuba baqhubeke nokuyigomela. Uthe lokhu kuzoqinisa imizimba yabo imelane negciwane uma kwenzeka libangena.
Ngokwezibalo, iKwaZulu-Natal isagome ngokugcwele abantu abangu-2.7 million, kwathi abangu-4.4 million, basagome uhhafu.
“Siyabanxusa labo abangakagomi ukuthi beze bezogoma. Lokhu kwenzela ukusiza bona ngoba labo abangakagomi basengcupheni yokutheleleka ngeCovid-19, maqede bayidlulisele kwabanye. Basengcupheni futhi yokuthi bagule kakhulu, ize ibabulale uma beqhathaniswa nalabo abagomile,” kuphetha uNksz Simelane.