Kuhlomula izitshudeni embukisweni i-Africa’s Travel Indaba
ZIZOTHOLA ithuba eliyingqayizivele izitshudeni eziwu-20 ezingasebenzi eziqokwe ukuba zibe ngamanxusa ombukiso omkhulukazi wezivakashi i-Africa’s Travel Indaba (ATI), oqhubeka eNkosi Albert Luthuli International Convention Centre (ICC).
Izitshudeni eziqokiwe zizosiza abahambele umbukiso ngolwazi abaludingayo, izindawo abangazivakashela eThekwini naKwaZulu-Natal yonkana kanjalo nangokuziyalela lapho kufanele ziye khona.
Kukhona nezitshudeni ebezisanda kuphothula uhlelo lokufundela umsebenzi kwiTourism KwaZulu-Natal, nazo ezibe senhlanhleni yokuthi zizosebenzisana nezivakashi.
Kulo nyaka i-Africa’s Travel Indaba kulindeleke ukuthi ihanjelwe ngabantu abawu-4000, okukhona kubo iizithunywa nezintatheli abavela emazweni ahlukene.
Ucwaningo lukahulumeni luveza ukuthi umkhakha wezokuvakasha
uqashe abantu abawu-740 000 futhi ungenisa u-9% emalini yezwe.
Kulindeleke ukuthi ukubuya kweAfrica’s Travel Indaba kuvuse umkhakha wezokuvakasha KwaZulu-Natal obuthikamezwe yiCovid-19, izibhelu zikaJulayi nezikhukhula.
Izitshudeni eziyyingxenye yalolu hlelo zithe zijabule ngethuba ezilitholile lokusebenza embukisweni omkhulukazi wezokuvakasha, ozoze uphele ngoLwesine.
UMnuz Mel Ntombela onguSihlalo weNanda, Ntuzuma neKwaMashu Community Tourism Organisation, uthe uyajabula ngokubuya kwalo mbukiso ngoba uyabasiza ukuthi baxhumane nabathengi bamazwe ahlukene.
Uthe uzoba nemihlangano ehlukene ngisho nangohlelo lwe-internet eyokudayisa imikhiqizo yalapho ephuma khona.
UMasipala weTheku uthe i-Africa’s Travel Indaba kulindeleke ingenise uR72.5 million, idale namathuba omsebenzi awu-150.