Babona uNgidi engayitakula i-ANC eKZN
AMANYE amagatsha e-ANC KwaZuluNatal, abona loyo owayengumqondisi-jikelele kwiHhovisi likaNdunankulu esifundazweni, uMnuz Nhlanhla Ngidi, engakwazi ukuhlenga i-ANC ekulahlekelweni ngamavoti.
Amagatsha afuna ukuthi uNgidi aqokelwe kwesokuhola i-ANC KwaZulu-Natal, athi anovalo lokuthi i-ANC ingase ilahlekelwe yisifundazwe okhethweni luka-2024 uma kungashintshwa ubuholi obukhona njengamanje.
Amanye amagatsha e-ANC kwisifunda iTheku, King Cetshwayo neLower South Coast, afuna ukuba uNgidi aqokelwe kwesikasihlalo we-ANC KwaZulu-Natal.
Kulindeleke ukuthi abhekane nonguSihlalo we-ANC KwaZulu-Natal, uMnuz Sihle Zikalala, noMgcinimafa we-ANC esifundazweni, uNkk Nomusa Dube-Ncube, engqungqutheleni yokukhetha ubuholi ezokuba ngoJulayi.
Okhulumela amagatsha aseka uNgidi, uMnuz Mandla Chiliza, uthe babona engakwazi ukutakula i-ANC esimeni ebhekene naso sokwehlelwa ngamavoti.
“Sihlalile singamagatsha e-ANC KwaZulu-Natal, ngokubuka indlela iqembu lethu elingenzanga kahle ngayo okhethweni lohulumeni basekhaya, lapho khona lilahlekelwe yinqwaba yomasipala ababuyele kwi-IFP, sibe sesibona ukuthi sidinga umuntu ozobuyisa ithemba.
“Ngokubuka ulwazi uNgidi analo, sibone kunguye umuntu ongakwazi ukubuyisa ithemba kwi-ANC.
“Usebenzile ezindaweni eziningi ezahlukene nokubalwa kuzo ekubeni wumqondisi-jikelele eHhovisini likaNdunankulu.”
UChiliza, oqhamuka kwisifunda iTheku, kuWard 98, uthe banokwesabela ukuthi i-ANC izophinde ingenzi kahle okhethweni luka-2024, uma kuzitshwa umuntu onjengoNgidi ukuthi ayihole.
“Kungase kwenzeke i-ANC igcine ingasayiphethe iKwaZulu-Natal. Iqiniso wukuthi abantu abaningi abayanga ukuyovota okhethweni lwangonyaka odlule ngoba becasukele i-ANC.
“Abantu abazange bavotele amaqembu aphikisayo kodwa bakhetha ukungavoti. Lokho kuholele ekutheni i-ANC ilahlekelwe ngamavoti omasipala abaningi. Sesifikile isikhathi sokuthi i-ANC ivuke izithathe.”
UChiliza uthe baqale ukubamba izingxoxo noNgidi emva kwemiphumela yokhetho lwangonyaka owedlule.
“Emva kokuxoxa nomndeni wakhe nabantu asondelene nabo, ube eseveza ukuthi uzokwamukelwa ukuphakanyiswa kwegama lakhe.
“Njengamanje sesilinde ukuthi kuqale ukuphakanyiswa kwamagama abazongenela umbango wezikhundla.”
UNgidi akamusha kwi-ANC njengoba ayeyilungu eliqavile lophiko lwe-ANC olwalulwa nobandlululo, uMkhonto weSizwe.
Uke wamela i-ANC kwisiShayamthetho saKwaZulu-Natal ngaphambi kokuthi ayosebenzela uphiko olwalulwa nenkohlakalo, oFezela.
Igama lakhe like lavela kukhulunywa ngesikhundla sobumeya kuMasipala iTheku ngesikhathi i-ANC yenza izinguquko ngo-2019, kepha leso sikhundla sagcina sithathwe nguMnuz Mxolisi Kaunda.