Umndeni usucabanga ukungcwaba umlenze isidumbu singatholakali
AWUKWAZI okumele ukwenze umndeni, osathole umlenze kuphela welungu lawo osagcinwe emakhazeni njengoba kukholakala ukuthi isidumbu sawo esiphelele singaphansi kwemfucuza embondelane kuguguleka izindlu nezihlahla ngesikhathi sezikhukhula ezibonakale KwaZulu-Natal emasontweni ambalwa edlule.
UNksz Nonhlanhla Miya
(56) waseWyebank, eThekwini, ongowokudabuka e-Eastern Cape, kuthiwa wayesemzini wakhe okuyo le ndawo nomzukulu wakhe, uSisanda Miya (6) ngesikhathi indlu abahlala kuyo igugulwa yizikhukhula. Emva kwamasonto amabili bethungathwa, amalungu omphakathi athola isidumbu somzukulu nomlenze abakholwa wukuthi ngokaNksz Miya.
Udadewabo kaNksz Miya, uNksz Nomvano Mbanjwa, ekhuluma neSolezwe izolo, uthe umndeni usadidekile ukuthi uqhubeke nokufihla umlenze kuphela njengoba umzimba kadadewabo ungakatholwa.
“Siyakholwa ukuthi isidumbu sikadadewethu sivaleleke ngaphansi kwemfucuza, eduze kwalapho kwatholakala khona isidumbu somzukulu wakhe nalesi sitho sakhe somzimba.
“Inkinga wukuthi ngaphezulu kugcwele izingodo ezinkulu nenhlabathi enamatshe. Amalungu omphakathi asilekelelayo asembe adela kodwa kulukhuni ukususa imfucuza,” usho kanje.
Uthe kuze kube manje alukho usizo abalutholayo kubatakuli, sebecele bancama befuna okungenani umshini wokumba kususwe imfucuza. Uveze ukuthi likhona iphunga elizwakalayo elenza ziqine izinsolo zokuthi nebala kukhona izidumbu ezingaphansi kwemfucuza embondelene emhosheni osesebeni lomfula iMolweni.
Uthe uma sebehlanze ngedela, kuyobaphoqa ukuthi bangcwabe umlenze njengoba kuseyiyona nto abanayo.
Echaza ngokutholakala komlenze, uthe ngesikhathi kumatasa kuthungathwa, indodana yakhe yazithela phezu kwawo okuthiwa uhlukane nomzimba womnikazi kusuka ethangeni, okuthe uma bewubheka kwaba nezimpawu umndeni ozifanisayo ukuthi ngowelungu lawo.
Injulabuchopho kwezomlando namasiko, uMnuz Ndabe Myeza, ithe ezimweni lapho umndeni uthola kuphela isicubu esithile selungu lawo, uyasithuna ngendlela ejwayelekile.
“Ngisho ngabe umndeni uthola ugebhezi lwekhanda kuphela, luyathunwa, ungalufaka ngisho ebhokisini lezingane. Kuyothi uma kwenzeka uthola ezinye izitho ngokuqhubeka kwesikhathi, nazo okuqinisekisiwe ukuthi ngezelungu lawo, zimbelwe phezu kweliba okuthunwe kulo ezokuqala ukugwema ukuthi umuntu oyedwa abe namaliba amaningi,” usho kanje.