Sebevumelekile abantu eCCMA
IZIHLATHI zizovakashela izindlebe kubasebenzi akade bengakwazi ukuziyela emahhovisi eCommission for Conciliation, Mediation and Arbitration (CCCMA) ngenxa yokuthi ebengabamukeli abazifikelayo kusukela ngoJulayi ka-2020.
I-CCMA wuhlaka loMnyango wezaBasebenzi olusetshenziswa ukuxazulula ukungaboni ngaso linye phakathi kwabaqashi nabasebenzi. Yiyona engenelelayo noma izingxoxo sezifinyelele kwangqingetshe phakathi kwezinyunyana nabasebenzi ukuze kutholakale isixazululo esizovuna zonke izinhlaka ezithintekayo.
Umqondisi weCCMA, u-Adv Cameron Morajane, uveze ukuthi bathatha isinqumo sokuvala ukuthi abantu bavakashele emahhovisi abo ngo-2020 ngenxa yeCovid-19 kodwa lokhu akusho ukuthi bama ukusebenza njengoba babesebenzisa ezinye izindlela zokuxhumana nabantu.
Uthe abantu bebekwazi ukuthinta iCCMA ngokungena kumaselula abo ngohlelo lweCCMAConnect kanjalo nakumakhompyutha ngohlelo lwe-e-Referral.
Uthe phakathi kukaJulayi
30, 2020 kuya ku-Ephreli 26 walo nyaka banikwe amacala awu-29 566 kanti awu-6 269 alaleliwe aze asonjululwa kusetshenziswa ubuchwepheshe.
“Besimatasa yize abantu bebengazizeli emahhovisi ethu. Ngo-2021/22 sikwaze ukulalela amacala awu-116 692. Siye sangenelela senza umsebenzi wethu. Njengoba umengameli ethe izwe alisekho ngaphansi kwenhlekelele kusukela ngoEphreli 5 sibone kuyisikhathi esikahle sokuthi sivumele abantu ukuthi bazizele,” kusho uMorajane.
Uthe kusukela namhlanje abantu sebevumelekile ukuthi baye emahhovisi eCCMA uma benezinkinga ezidinga ukuxazululwa yilolu hlaka.
Ucele abantu balandele imithetho yokuvikela ukubhebhetheka kweCovid-19 uma besemahhovisi eCCMA njengokugqoka izifonyo, ukuqhelelana nokuhlanza izandla. Uthe bakwenzela ukuvikela abasebenzi nomphakathi wonkana.
Ugqugquzele abantu ukuthi bazisebenzise izindlela zobuchwepheshe zokuxhumana neCCMA uma bekwazi ukuzisebenzisa, baye emahhovisi uma kuwukuthi abakwazi ukusebenzisa lezi zindlela.
Ucele abantu ukuthi basebenzisane nabo njengoba bevula kabusha amahhovisi, babe nesineke nozwelo kulesi sikhathi.