Kungihlabe umxhwele okwenziwe yisizwe sakwaNyavu
MHLELI: INkantolo eNkulu yaseMgungundlovu ihlukanise inhloko nesixhanti ngombango wobukhosi obudla lubi esizweni sakwaNyavu.
Isinqumo senkantolo siwuqedile umbango osubulele abantu abaningi kulesi sizwe kanti abaningi babo kube yizinduna. Ngizwelana kakhulu nemindeni elahlekelwe ngabathandiweyo bayo ngenxa yobudedengu boMnyango wezokuBusa ngokuBambisana nobuHoli boMdabu.
Kuyamangaza-ke nokho ukuthi sekungaze kuchitheke igazi ngenxa yobudedengu bomnyango obaluleke kangaka kahulumeni kepha indaba ibe isobala. Ukugudluza inkosi yesizwe esihlalweni sayo kungalandelwanga imibandela efanele, kushayisa ngovalo ngekusasa lalo mnyango nenhlalonhle yomphakathi.
Kuyacaca ukuthi sisazolahlekelwa ngabaholi abaqotho njengoba kuhlaluka obala ukuthi abangaboni bayadonsana kulo mnyango.
Isinqumo senkantolo sibuyise uzinzo kwazise sihambisane nemizwa yezakhamuzi eziwumnsinsi wokuzimilela esizweni sakwaNyavu. Ngisamile emazwini ami ashicilelwa kule ngosi athi: “Mhlazane kwabuyelwa inkosi yesizwe uNdabezitha Skhosiphi kaBangubukhosi Mdluli esihlalweni sakhe, ngeke kuphinde kufe muntu.”
Impela liphume nobomvu njengoba yonke into isibuyele esimeni ebesifunwa yisizwe. Benginovalo lokuthi hleze inkantolo ikhiphe isinqumo esiphikisana nesizwe nobekuzosusa olukhulu udungunyane kuphela nya ngesizwe. Ongahambisani nesinqumo uzozihambela yena endaweni futhi nalapho uzobe engaxoshwa muntu.
Ngizizwa ngithobekile kakhulu ukubona isizwe sakwaNyavu siyimbumba silwela okungokwaso kuze kube sekugcineni. Kuyacaca ukuthi lesi sizwe njengoba sibizwa ngamalalandawonye, siliqonda kahle kamhlophe igama laso eligqugquzela ubunye.
Isizwe sakwaNyavu siyisibonelo esihle nakwezinye izizwe. Abenzi bobubi kufanele bavume izono zabo besenganeno kwethuna ukuze bathole intethelelo emazulwini ngomhla wokuphela, kwazise igazi labantu silikhomba ezandleni zabo.
Niqhubeke njalo maNyavu nokulwela okungokwenu noma ngabe izimo zinimele kanjani. Ngithokozile kakhulu ngobumbano lwezinduna zesizwe nomphakathi wonke wakwaNyavu namaphethelo. UNdabezitha ukhombisile ukuthi ungumholi oqotho ngenkathi sekuvalwe izikhungo nezikole, abantu belwela yena, wancamela kubulawe yena, kunokuthi kuvalwe izikole kwazise imfundo iyikusasa lesizwe.
Ngidlulisa okukhulu ukubonga abezindaba njengoba bebesibikela lolu daba ngokungachemi ukusuka ngokuhlala. Ngithi nje, izandla zedlula ikhanda ngomsebenzi wenu omuhle.
Phondolwendlovu Mzolo
EMKHAMBATHINI