Ubenzelwe umcimbi umfana ozikhungile
UDIDEKILE umndeni womfana oneminyaka engu-12 ozikhunge esihlahleni washona, kusaphele izinsuku ezimbili umenzele umcimbi wokubungaza usuku lwakhe lokuzalwa.
U-Asanda Ncamu, obefunda uGrade 6 eMajozini Primary, eJozini, utholwe wumphakathi elenga esihlahleni esisehlathini kule ndawo ngoLwesine.
Kuthiwa ugcine ukubonakala ephila ngoLwesithathu ntambama ngesikhathi eyolanda izimbuzi ezazilusiwe, njengenhlalayenza ehamba nelinye ilungu lomndeni alingana nalo.
Kuvela ukuthi umndeni wahlaba umkhosi ngoba ubona engabuyi ekhaya u-Asanda, wabhekwa wumphakathi nasedamini elikule ndawo kodwa wangatholakala.
Kwenzeka lesi sigameko nje, lo mndeni ubukade usazikhotha amanxeba emva kokushonelwa yindodakazi yawo eneminyaka engu-15 engcwatshwe ekuqaleni kuka-Ephreli, eyaphathwa ikhanda yagcina ngokushona.
Lo mndeni uthi kawusoli isandla semfene ekushoneni kuka-Asanda kwazise intambo azikhunge ngayo uyithathe endlini ehlala amathuluzi akulo muzi.
Umzala ka-Asanda, uNksz Bongiwe Molefe, uthe ibaphithanisela amakhanda indlela enesihluku u-Asanda azibulale ngayo. Uchaze umufi njengengane ebizithulela, izikhululekele futhi ingakhombisi ukuba nengcindezi kwazise ubeneminyaka emithathu efudukele eJozini esuka ekhabonina, KwaHlabisa.
“Sishaqekile siwumndeni ngoba kwenzeke lesi sigameko sisazilele ingane yami eshone ngokuphathwa yikhanda. Akukho u-Asanda ashiye ekubhale phansi ukuthi kungani ethathe lesi sinqumo esithusayo. Ngo-Ephreli 25 ugogo wakhe ubemenzele umcimbi wokugubha usuku lwakhe lokuzalwa,” kusho uNksz Molefe ngosizi.
Uveze ukuthi isidumbu sikaAsanda sitholakale ekujuleni kwehlathi abebengacabangi ukuthi angafinyela khona kalula.
Okhulumela amaphoyisa KwaZulu-Natal, uLieutenant Colonel Nqobile Gwala, uthe kuvulwe idokodo ngokushona komuntu eliphenywa ngamaphoyisa aseJozini.